«Ես փորձում եմ որոշ չափով նպաստել իրավագիտակցության զարգացմանը իմ հայրենիքում»

«Ես փորձում եմ որոշ չափով նպաստել իրավագիտակցության զարգացմանը իմ հայրենիքում»

743

Խաչատրյան Դիանան ինսթագրամյան Your lawyer էջի հիմնադիրն է, որը կարճ ժամանակում մեծ լսարան հավաքեց և արժանացավ հետևորդների ուշադրությանը:
Դիանան սովորում է Հայաստանի ֆրանսիական համալսարանում,
Իրավաբանության ֆակուլտետի 2-րդ կուրսում: Իր էջում ինֆորմացիան ներկայացնում է մատչելի տարբերակով, ներկայացված թեմաները ամփոփում է Quiz-ի ձևով, պատմում է հետաքրքիր օրենքների և դատերի մասին:

-Ի՞նչպես ընտրեցիք իրավաբանի մասնագիտությունը:

-Կյանքիս ամենաբարդ ընտրություններից մեկը, եթե ոչ ամենաբարդը եղել է մասնագիտական կողմնորոշումը: Դպրոցական տարիներում տատանվել եմ կենսաբանության և մաթեմատիկայի ուղղությունների մեջ, մինչդեռ ընտրեցի բոլորովին այլ ուղղություն: Դժվար է 17-18 տարեկանում հասկանալ, թե ինչով ես ուզում զբաղվել ամբողջ կյանքում, այն էլ այն դեպքում, երբ նույնիսկ հստակ պատկերացում չունես որոշ մասնագիտությունների մասին: «Ընտանեկան ժողովի» ժամանակ որոշեցինք, որ ընտրելու եմ իրավաբանի մասնագիտությունը, ( ի դեպ հայրիկս և եղբայրս նույնպես այս ոլորտի մասնագետներ են): Դպրոցումս (Անանիա Շիրակացու ճեմարան) հաճախ տարբեր համալսարանների նեկայացուցիչների էինք հյուրընկալում, և հանդիպումներից մեկի ժամանակ էլ որոշեցի, որ դիմելու եմ Ֆրանսիական համալսարանի իրավաբանության ֆակուլտետ: Այժմ, ավելի քան համոզված եմ, որ ճիշտ ընտրություն եմ կատարել, և եթե նորից հնարավորություն լիներ ընտրության՝ նորից կդիմեի նույն համալսարանի նույն ֆակուլտետը:

-Ձեր հրապարակումներից մեկում նշել էիք, որ Հայաստանում մարդկանց իրավագիտակցության մակարդակը համեմատաբար ավելի ցածր է: Ի՞նչ միջոցներ պետք է կիրառվեն, որ վիճակը բարելավվի:

-Ամեն ինչ սկսվում է դպրոցից: Միանշանակ այս հարցում մեծ դեր են խաղում նաև ընտանիքը և հասարակությունը, բայց առաջնային խնդիրը դրված է ուսուցչի ուսերին: Դեռևս մանկուց երեխայի մեջ պետք է սերմանել կարգապահություն և բարեխղճություն: Երեխան պետք է կարողանա պատասխանատվություն կրել իր կատարած քայլերի համար, միևնույն ժամանակ խրախուսվի լավ արարքների համար: Այս ձևով երեխան կտարբերակի ճիշտը սխալից, լավը՝ վատից, օրինական արարքը՝ ոչ օրինականից: Իրավագիտակցության մեջ իր ուրույն դերն ունի դպրոցներում դասավանդվող հասարակագիտություն առարկան: Սա առաջին ձեռնարկն է, որի միջոցով երեխան պատկերացում է կազմում իր իրավունքների և պարտականությունների մասին: Այս առարկային շատերը լուրջ չեն վերաբերում, մինչդեռ հետագայում գիտակցում են դրա կարևորությունը և փոշմանում, որ այն անտեսել են: Իրավագիտակցության վրա, որքան էլ զարմանալի թվա, բայց իր ազդեցությունն են ունենում դպրոցի խիստ կանոնները: Դրանք ստիպում են աշակերտին ավելի հետևողական լինել իր արարքների նկատմամբ, հարգել դիմացինին, ունենալ լավ առաջադիմություն: Վերջերս ինստագրամյան էջում անդրադարձա նաև հայկական սերիալներին և անհրաժեշտ եմ համարում նշել, որ իրավագիտակցության վրա իր ազդեցությունն են ունենում նաև սերիալները և հաղորդումները: Դրանց միջոցով կարող ես կրթել մի ողջ հասարակություն, եթե սերիալներում ավազակության փոխարեն խրախուսվեն լավ սովորելն ու կարգապահությունը, համոզված եղեք, որ տարիների ընթացքում մենք կնկատենք զգալի դրական փոփոխություններ կրթական համակարգում:

-Ինսթագրամյան էջի նյութերում անդրադառնում եք մարդկանց իրավունքներին և պարտականություններին. ե՞րբ ծագեց գաղափարը՝ ստեղծել նման էջ:

-Համալսարանում, երբ սովորում էի որևէ օգտակար նյութ, արագ սկսում էի ոչ իրավաբան ընկերներիս շրջանակում տարածել դրանք, քանզի համարում էի, որ դրանք կարևոր են յուրաքանչյուր քաղաքացու համար: Հետո նկատեցի, որ հետաքրքրությունը մեծ է և անըդհատ հարցնում են՝ հը՞ն նոր բան սովորել ես, որ մեզ պատմես, մեր իրավաբան:
Այդպես ծագեց միտք` բացել էջ, որտեղ կկիսվեմ իմ փորձով, կպատմեմ հետաքրքիր օրենքների, դատերի մասին, կասեմ կայքեր, որտեղ կգտնեն հոդվածներ, օրենքներ, հետաքրքիր նյութեր, կպատասխանեմ շատերին հուզող հարցերին և կիրազեկեմ իմ հետևորդներին իրենց իրավունքների և պարտականությունների մասին: Ես էլ փորձում եմ որոշ չափով նպաստել իրավագիտակցության զարգացմանը իմ հայրենիքում:

-Ո՞ր թեմաներն են առավել պահանջված, և ո՞ր նյութերն են ամենաընթերցվածները:

-Դժվար է առանձնացնել մի քանիսը, քանի որ նյութերս կազմում եմ հենց իրենց պահանջարկի հիման վրա: Օրինակ` վերջերս, երբ փոստ արեցի, որտեղ պատմում էի դատարան իմ առաջին այցի մասին, բոլորին հուզող հարցը դարձավ datalex-ը և կայքից օգտվելու ձևը (կայք, որի միջոցով կարող ես իմանալ դատական նիստերի օրերը, վայրը և այլն) և հաջորդ փոստս եղավ բնականաբար datalex-ի մասին: Շատ են սիրում, երբ շաբաթվա վերջում (կամ ամսվա) կատարում ենք թեմաների ամփոփում Quizի տեսքով, մեծ արձագանք է լինում, երբ տեղադրում եմ իրավիճակներ, որոնք իրական դեպքեր են, և ասում եմ, որ ներկայացնեն հիմնավոր պատասխան՝ ո՞վ է մեղավոր, արդյո՞ք կենթարկվի քրեական պատասխանատվության, թե բացակայում է հանցակազմի տարրը և այլն:

-Ի՞նչ արձագանքներ եք ստանում ձեր հետևորդների կողմից:

-Նախ ասեմ, որ չէի սպասում, որ այսքան կարճ ժամանակահատվածում էջս այսքան կսիրվի և կստանամ նման դրական արձագանք: Այսքան նվիրված և ոգևորված վարում եմ էջս, որովհետև ստանում եմ դրական էներգիայի աղբյուր հետևորդներից: Շնորհակալ եմ յուրաքանչյուրին, ով վստահում է ինձ և գնահատում է կատարածս աշխատանքը, որը անկեղծ ասած, բարդ համատեղելի է Ֆրանսիական համալսարանի հետ:

-Ձեր կարծիքով՝ ի՞նչ փոփոխությունների կարիք կա ՀՀ սահմանադրության մեջ:

Իրականում բարդ հարց է, և ինքս ինձ դեռևս չեմ համարում այնքան հմուտ մասնագետ, որ խոսեմ Սահմանադրության մեջ առկա սխալներից:

Հայկանուշ Հովսեփյան

2-րդ կուրս

Կիսվել