1991 թվականի դեկտեմբերի 10-ին տեղի ունեցավ հանրաքվե, որը հաստատեց սեպտեմբերի 2-ին հռչակված Լեռնային Ղարաբաղի Հանրապետության անկախությունը։ Հանրաքվեին դրված էր հետևյալ հարցը՝ «Համաձա՞յն եք Դուք, որպեսզի հռչակված Լեռնային Ղարաբաղի Հանրապետությունը լինի անկախ պետություն, ինքնուրույն որոշելով համագործակցության ձևը ուրիշ պետությունների և ընկերակցությունների հետ»։
Այդ օրը հանրապետության բնակչության 80%-ը մասնակցեց հանրաքվեին, որոնց 99%-ից ավելին քվեարկեց անկախության օգտին։
