Ինչպե՞ս օգնել այգեգործին, մեղվապահին, չրագործին ու պտուղ-բանջարեղեն արտահանող ֆերմերներին արտադրանքը շուկա հասցնելու առումով:
Ամերիկյան ֆինանսավորմամբ մեկնարկած նոր ծրագիրը 5 տարով է Հայաստանում, 3 միլիոն դոլար ընդհանուր արժեքով, որի ուղիղ կեսը, որպես դրամաշնորհ հատկացվելու է գյուղացիական տնտեսություններին, տարբեր սարքավորումներ ձեռք բերելու նպատակով:
RED NEO մեկնարկին մասնակցել է նաև Երևանում Վաշինգտոնի նոր դեսպան Լին Թրեյսին, նա արդեն հասցրել է տպավորվել մեր գինու և չրի բարձր համային որակներով, ինչպես նաև ֆերմերների ձեռնարկատիրական մոտեցմամբ:
Մեղր արտահանելու համար, պարզվում է, պայման կա, փեթակների քաղցր նեկտարը պետք է քամված լինի հատուկ ստանդարտի սարքերով: Նաև չրանոցի, ջերմոցի ու սառնարանի տեխնիկա ձեռք բերելու համար դրամաշնորհ կտան գյուղացիական տնտեսություններին,- հայտարարում են CARD հիմնադրամից: Միակ խնդիրը, որ բիզնեսը սկսնակ չլինի:
«Գյուղական տնտեսական զարգացում-նոր տնտեսական հնարավորություններ» ծրագրի ղեկավար Սուսաննա Խաչատրյանը նշեց, որ այն ֆերմերները, որոնք իրենց միջոցներով արդեն իսկ որոշակի հիմք դրել են իրենց գործում, հնարավորություն կունենան առաջ գնալ, այս փոքր աջակցության միջոցով:
Աջակցությունը շահառուներին՝ լինելու է անվերադարձ գումար:
Հայաստանում ԱՄՆ արտակարգ և լիազոր դեսպան Լին Թրեյսին ասում է, որ ծնունդով ինքը կաթի մշակման ու անասնապահությամբ հայտնի Օհայե նահանգից է, և շատ լավ է պատկերացնում տնտեսության մեջ գյուղոլորտի դերը, այնպես որ, օգնելով հայկական բիզնեսին՝ վերացնել խոչնդոտները, ԱՄՆ կառավարությունն օգնում է Հայաստանի տնտեսական հեղափոխությանը:
-Ես կարծում եմ, որ այս ծրագիրը կօգնի գյուղացիական տնտեսություններին հատապտղային բիզնեսից մինչև գինեգործության ոլորտում իրացնել, արտահանել իրենց արտադրանքն ու շատ ավելի մեծ եկամուտներ ստանալ,-հավելեց Լին Թրեյսին:
-Տարիներ առաջ քչերն էին հավատում, բայց հենց CARD ի շնորհիվ Հայաստանը դարձավ այծի պանրի արտադրությամբ ու արտահանմամբ զբաղվող երկիր,- հիշեցին դահլիճում:
Հերթն այժմն հատապտղային բիզնեսից մինչև տնկարան ու ջերմոց ունեցող կոպերատիվների կայացմանն է:
Ծրագրի գործընկեր է ընտրվել Հայաստանի Ագրարային համալսարանը:
-Հնարավորություն կլինի արդեն գյուղմեքենաների և սարքավորումների վերանորոգման և սպասարկման առումով համատեղ ծրագիր իրականացնել ,- հավելեց Հայաստանի Ագրարային համալսարանի ռեկտոր Վարդան Ուռուտյանը:
Փաթեթն ունի նաև եղանակային ռիսկերի կանխատեսումից մինչև վնասատուների դեմ պայքարի բաղաղդրիչ, կաշխատեն Հայաստանի 60 բնակավայրում, որտեղ էլ կտան ծրագրով նախատեսված 100 դրամաշնորհները:
Միայն 3 ամիս անց պարզ կլինի, թե որ գյուղերն են ընտրվել:
Արմենուհի Պետրոսյան
5-րդ կուրս
