Սահմանը հսկող զինվորները բացել են ուխտավորների ճանապարհը: Չինարիի վանքում հոգևոր տոն է:
-Շատ հուզված եմ․ առաջին անգամ եմ տեսնում նման բան մեր գյուղում,- անկեղծացավ Նորաշեն գյուղի բնակչուհի Օվսաննա Աթոյանը:
Հակառակորդի դիրքից դեպի եկեղեցի հարյուր մետր էլ չկա: Կանաչ բնությունը նվազեցրել է ռիսկը:
Կռիվը դեռ չեր սկսվել, երբ ամրաններ դրեցին վանքը նորոգելու համար, սակայն չհասցրին․ հակառակորդի գնդակը հասավ մինչև հինավուրց եկեղեցի: Այն գերի ընկավ, ամրանները ժանգոտեցին:
– Բոլոր հենակետերից դիտարկվում էր ճանապարհը, դրա համար վտանգ կար,-նշեց Չինարի համայնքի վարչական ղեկավար Սամվել Սաղոյանը:
Գալիս են խաչակնքվելու կարևորի՝ խաղաղության համար։ Շատերի մանկությունն է անցել այստեղ, օրինակ՝ ծագումով չինարեցի կոտայքի մարզպետինը:
Կոտայքի մարզպետ Ռոմանոս Պետրոսյանի խոսքով՝ ինքը 30 տարի առաջ է եղել եկեղեցում, անգամ նկար ունի մուտքի մոտ:
Խունկի հոտը վաղուց չէր տարածվել սուրբ Խորանաշատում: Դարավոր լռությունից հետո առաջին անգամ վանական համալիրը հյուրընկալեց հոգևոր առաջնորդի:
Առաջին հանրապետության անկախությունից ի վեր այստեղ քահանայական, առավել ևս՝ եպիսկոպոսական առաջնորդական պատարագ չէր մատուցվել:
-Այսօր, այս եկեղեցին ամրոց ու բերդ է, ինչպես որ եղել է իր ամբողջ պատմության ընթացքում: Շատ երջանիկ եմ,- անկեղծացավ Տավուշի մարզպետ Հայկ Չոբանյանը:
Պատարագը մատուցեց Տավուշի թեմի առաջնորդը: Սահմանին հոգևոր ծեսը տևեց 2 ժամ: Բագրատ սրբազանը Սարդարապատի օրինակով ընդգծեց․- <<Հաղթանակներ էլի լինելու են, քանի դեռ հայ ժողովուրդն այստեղ ապրում է, բանակն էլ ՝ զգոն պահում սահմանը>>:
Մովսեսի Սուրբ Աստվածածին եկեղեցու գլխավոր հովիվ Տեր Աբել քահանա Քարտաշյանը ասում է.
-Էլի դժվարությամբ, էլի վտանգի ներքո, բայց գալիս ենք մեր սրբավայրը, գալիս ենք կենդանացնելու մեր նախնիների թողած ժառանգությունը։
Տավուշցիները խոստովանեցին, որ պատարագից գնում են աննկարագրելի զգացողություններով: Ուխտը ամրապնդեցին միասին երգելով:
Արմենուհի Պետրոսյան
5-րդ կուրս
