Պատերազմի այս օրերին COVID-19-ի մասին լուրերը նվազում են՝ չնայած վարակման նոր դեպքերի օրեցօր աճող թվերին: Օրերս կորոնավիրուսից մահացավ ԵՊՀ պատմության ֆակուլտետի հայոց պատմության ամբիոնի վարիչ, պատմական գիտությունների դոկտոր Արտակ Մովսիսյանը:
Սիրված պատմաբանի մահվան լուրը վշտացրեց նաև ուսանողներին:
«ԵՊՀ-ն կորցրեց մեծ պատմաբանի: Պատիվ եմ ունեցել լինելու նրա սանը: Մահվան լուրն իմացել ենք հաջորդ օրը։ Այն շատ ծանր տարան նրա բոլոր ուսանողները, այդ թվում նաև իմ կուրսը։ Սկզբում չէինք հավատում,- ասում է պատմության ֆակուլտետի ուսանողուհի Քրիստինե Կարապետյանը։ – Ուսանողների կողմից սիրված դասախոս էր։ Նրանից անընդհատ նոր բան կարող էինք սովորել։ Որքանով որ ես եմ հասցրել ճանաչել, շատ հայրենասեր մարդ էր, «հայի գենն իր մեջ կրող մարդ»»:
«Ի՞նչ հիշողություններ ունեք՝ նրա հետ կապված» հարցին ուսանողուհին պատասխանում է․ «Մեզ միշտ սովորեցնում էր անմնացորդ սիրել ու նվիրվել հայրենիքին: Հաճախ էր կրկնում, որ հայրենի հողը չի կարելի զիջել ոչ մի գնով: Նա բոլորիս հուշերում կմնա որպես հայրենապաշտ պատմաբան, որը թողել է գիտական արժեքավոր ժառանգություն և լուսավոր հետագիծ հայ պատմագիտության մեջ։ Վստահ եմ՝ շատ երիտասարդ պատմաբաններ նրան նմանվելու ուղին կբռնեն»:
Էլեն Առաքելյան
2-րդ կուրս