Մարտի 10-ից 13-ը Հայաստանում անցկացվեց «4Ps4YOUTH» կարողությունների զարգացման երկարաժամկետ ծրագրի երրորդ ՝ ամփոփիչ փուլը։ Հիշեցնենք, որ վերջինիս իրականացման նախաձեռնությունը «Հայկական Փի Ար ասոցիացիա» գիտատեղեկատվական հասարակական կազմակերպությանն էր, իսկ Հայաստանյան գործընկերը ԵՊՀ ժուռնալիստիկայի ֆակուլտետի «PR և հաղորդակցային տեխնոլոգիաներ» մագիստրոսական ծրագիրն էր։
Հայաստան էին այցելել ինը մասնակից Գերմանիայից, Վրաստանից, Պորտուգալիայից, Ուկրաինայից, Բուլղարիայից, Լիտվայից և Ռումինիայից։ Նրանց ուղեկցում էին «Հայկական PR ասոցիացիայի» նախագահ, ԵՊՀ ժուռնալիստիկայի ֆակուլտետի «PR և հաղորդակցային տեխնոլոգիաներ» մագիստրոսական ծրագրի ղեկավար Աստղիկ Ավետիսյանը և «Հայկական PR ասոցիացիայի» փոխնախագահ Արման Գրիգորյանը։
«Արդեն երկու տարի է, ինչ իրականացվում է ծրագիրը, որը երեք փուլից է բաղկացած։ Առաջին փուլը իրականացվել է Իտալիայում, երկրորդ փուլը՝ Գերմանիայում և երրորդ՝ ամփոփիչ փուլը իրականացվում է Հայաստանում,- պատմում է «Հայկական PR ասոցիացիայի» նախագահ Աստղիկ Ավետիսյանը։
Մասնակիցները հյուրընկալվել էին ԵՊՀ հյուրատանը, որտեղ տիրում էր և՛ ընկերական, և ՛գործնական մթնոլորտ։ Նրանք ծանոթանում էին հաղորդակցման արդի գործիքներին, փորձում էին դրանք կիրառել գործնականում, զարգացնում էին ստեղծարար մտածողություն և համատեղ քննարկում էին հանրային կապերի զարգացման միտումները։ Ուսոցողական այցով նրանք եղան LOFT ինքնազարգացման ու ժամանցի կենտրոնում, որտեղ տնօրեն Արևիկ Համբարձումյանը պատմեց ժամանցի կենտրոնի գործունեության մասին,ինչպես նաև պատասխանեց հյուրերին հետաքրքրող հարցերին և փոքրիկ շրջայցով նրանք ծանոթացան կենտրոնի աշխատանքին ։ Մասնակիցներին այցելեց նաև PicsArt գրաֆիկական խմբագրիչ, հավելվածի կորպորատիվ գործերի համակարգող Արփինե Զարգարյանը․ վերջինս պատմեց հավելվածի հնարավորություների և տարածվածության մասին։ Մասնակիցները եղան Թեքեյան կենտրոնում , ծանոթացան Iammedia.am կայքի գործունեությանը, կիսվեցին իրենց տպավորություններով և ստացած գիտելիքները իրենց երկրում գործնականում կիրառելու մասին։
«Խնդիրն այն է, որ եվրոպական և հայկական հարթակում հասարակական կազմակերպությունները, բուհական կառույցները իրականացնում են ծրագրեր, բայց դրանք դուրս են մնում հանրայնացման ոլորտից և այս ծրագրով մենք փորձեցինք տալ հիմնական գործիքներ և հիմնական PR տեխնոլոգիաներ, որպեսզի նրանք հնարավորություն ունենան ծրագրերի միջոցով հանրայնացնել իրենց տարած աշխատանքը»,-հավելեց Աստղիկ Ավետիսյանը։
Գրետա Այվազյան
4-րդ կուրս
