ԵԱՀԿ Մինսկի խմբի համանախագահող երկրների պատվիրակության ղեկավարները՝ ՌԴ արտգործնախարար Սերգեյ Լավրովը, ԱՄՆ պետքարտուղարի տեղակալ Սթիվեն Բիգանը և Ֆրանսիայի արտգործնախարար Ժան-Իվ Լը Դրիանը, ողջունել են ՌԴ և Ադրբեջանի նախագահների և ՀՀ վարչապետի 2020 թվականի նոյեմբերի 9-ի հայտարարության համաձայն Լեռնային Ղարաբաղի հակամարտության գոտում ռազմական գործողությունների դադարեցումը:
«ԵԱՀԿ Մինսկի խմբի համանախագահ երկրները կոչ են անում Հայաստանին եւ Ադրբեջանին շարունակել ամբողջապես իրագործել նոյեմբերի 9-ի հայտարարությամբ ստանձնած պարտավորությունները:
Համանախագահները նշում են ռազմական գործողությունների վերսկսումը թույլ չտալու նպատակով Ռուսաստանի Դաշնության կողմից ձեռնարկված միջոցների կարեւորությունը: Նրանք տարածաշրջանից բոլոր օտարազգի վարձկանների լիարժեք եւ արագ դուրս բերման կոչ են անում:
Համանախագահ երկրները հիշեցնում են Հայաստանին եւ Ադրբեջանին միջազգային մարդասիրական իրավունքին համապատասխան գործելու իրենց պարտավորության մասին, մասնավորապես, ռազմագերիների եւ զոհվածների մարմինների փոխանակման հարցում: Նրանք կարեւորում են Լեռնային Ղարաբաղի հակամարտության՝ ներառյալ վերջին ռազմական գործողությունները, հետեւանքով տեղահանված անձանց կամավոր եւ անվտանգ վերադարձի երաշխավորումը: Նրանք կարեւորում են Լեռնային Ղարաբաղում եւ նրա շուրջ պատմական եւ կրոնական ժառանգության պահպանման կարեւորությունը», – ասված է հայտարարության մեջ:
«Համանախագահ երկրները Հայաստանին եւ Ադրբեջանին կոչ են անում օգտվել հաստատված հրադադարից եւ բանակցություններ վարել երկարատեւ եւ կայուն խաղաղության համաձայնագրի շուրջ՝ համանախագահների հովանու ներքո: Այս համատեքստում համանախագահ երկրները կոչ են անում ընդունել համանախագահներին տարածաշրջանում առաջին իսկ հնարավորության դեպքում եւ բովանդակային բանակցությունների հանձնառություն ստանձնել», – նշել են Լավրովը, Լը Դրիանն ու Բիգենը:
