ՀԱՋՈՂՈՒԹՅԱՆ ԳՐԱՎԱԿԱՆԸ ՄՈՏԻՎԱՑՎԱԾ ԼԻՆԵԼՆ Է

ՀԱՋՈՂՈՒԹՅԱՆ ԳՐԱՎԱԿԱՆԸ ՄՈՏԻՎԱՑՎԱԾ ԼԻՆԵԼՆ Է

575

«Զրույց առաջին կուրսեցու հետ» շարքը պատմում է ԵՊՀ-ի նորեկ ուսանողների մասին, ներկայացնում, թե ինչպիսին էր նրանց կյանքն ու առօրյան համալսարան ընդունվելուց առաջ և ինչպիսին է հիմա։

Այս անգամ զրուցել ենք ԵՊՀ Ժուռնալիստիկայի ֆակուլտետի առաջին կուրսի ուսանողուհի Ստեֆանի Օհանջանյանի հետ։ Նա խոսել է իր հետաքրքրությունների, մասնագիտության ընտրության, կյանքում տեղի ունեցած փոփոխությունների մասին և ոչ միայն։

-Ի՞նչ հետաքրքրություններ, նախասիրություններ ունեիք, երբ աշակերտ էիք:

-Աշակերտական տարիներին ինձ միշտ պատկերացրել եմ իրավաբանի կամ դիվանագետի դերում, բայց միևնույն ժամանակ սրտումս թատրոնն է եղել։

-Ստեֆա՛նի, հե՞շտ եք կողմնորոշվել մասնագիտության հարցում:

Բավական շատ էի տատանվում․ բոլոր ոլորտներում ինձ տեսնում էի, բայց ընտրեցի ամենահետաքրքիր և բազմաբովանդակ մասնագիտությունը։

– Ի՞նչ  է փոխել ձեր կյանքում ուսանողական միջավայրը:

-Ընկալեցի մասնագիտությանս լրջությունը և էլ ավելի կապվեցի ընտրածս ոլորտի հետ։ Կյանքի ցանկացած շրջափուլում, ուզենք, թե չուզենք, բախվում ենք փոփոխությունների, բայց կարևոր է, որ այդ փոփոխությունները բացասական ազդեցություն չունենան մեզ վրա։ Իմ դեպքում՝ փոփոխությունները դրական են։

-Մոտիվացված լինելը կարևո՞ր է։ Ո՞վ կամ ի՞նչն է ձեզ մոտիվացնում:

-Իմ կարծիքով մոտիվացված լինելը հիմք է հանդիսանում նպատակի իրականացման։ Հաջողության գրավականը մոտիվացված լինելն է։ Ինձ մոտիվացնում է կատարածս աշխատանքի արդյունքը։

-Ի՞նչ կփոխեիք համալսարանում:

-Կարծում եմ՝ մեր համալսարանում փոփոխություններ անելու կարիք չկա, քանի որ վերջիններիս առկայության դեպքում, համալսարանը ժամանակին ապահովում է դրանց իրականացումը։

-Ի՞նչ խորհուրդ կտաք դիմորդներին:

-Մինչ համալսարան դիմելը համոզվա՛ծ եղեք ձեր ընտրության հարցում, սիրե՛ք ձեր մասնագիտությունը և եկե՛ք համալսարան՝ ձեր ոլորտում առաջատարը լինելու համար։

Այժմ հասկանանք՝ ինչպես են փոխվել Ստեֆանիի մոտեցումները որոշ հարցերի շուրջ:

-Ձեր կյանքի կարգախոսը, երբ աշակերտ էիք և հիմա, երբ ուսանող եք։

-Ես միշտ մեկ կարգախոս եմ ունեցել․ երբե՛ք չհանձնվել և լինել առաջինը։

-Մարդկային բնավորության ո՞ր գիծն էիք կարևորում նախկինում և հիմա:

-Միշտ կարևորել եմ ազնվությունը, գնահատելու կարողությունը և մարդու սկզբունքային լինելը։

-Ի՞նչով է զբաղվում Ստեֆանին ազատ ժամանակ:

-Ազատ ժամանակ գրքեր եմ կարդում, զբաղվում սպորտով և ֆիլմեր դիտում։

-Ո՞րոնք են Ձեր սիրելի և նախընտրելի գրքերը։

Բավական շատ են սիրելի գրքերս, և ամեն անգամ դրանց ավելանում են նորերը։ Այդ պատճառով փոխվում են նաև նախասիրություններս։

Քնարիկ Վարդանյան

1-ին կուրս

Կիսվել