Ընդունելության քննությունների փորձությունը. չընդունված դիմորդները բողոքում են

Ընդունելության քննությունների փորձությունը. չընդունված դիմորդները բողոքում են

116

Արդեն մի քանի օր է՝ դրական միավորներ հավաքած, բայց բուհեր չընդունված դիմորդները, նրանց ծնողները բողոքի ակցիա են անում՝ ասելով, որ կրթություն ստանալն իրենց իրավունքն է: Այսօր ԿԳՄՍ նախարարության դիմաց կրկին շարունակվում էր ակցիան: Ցուցարարները պահանջել են հանդիպում նախարար Արայիկ Հարությունյանի հետ, սակայն հանդիպումը չկայանալու պատճառով դիմորդները և ծնողները փակել են Վազգեն Սարգսյան և Խորենացի խաչմերուկը, որի հետևանքով եղել են բախումներ ցուցարարների և ոստիկանների միջև. 2 անձ բերման է ենթարկվել, սակայն որոշ ժամանակ անց ազատվել են:

Խնդրի հետքերով.

Բանն այն է, որ այս տարի բուհերի ընդունելության կարգում եղել են արմատական փոփոխություններ: Բացի այն, որ մեկ միասնական քննություն են հանձնել դիմորդները, այս տարի գործել է նաև առաջին հայտի գերակայության սկզբունքը: Մայիսի 21-ին Կառավարության նիստում Արայիկ Հարությունյանն ասաց , որ դիմորդը պետք է կարևորություն տա մասնագիտական ընտրությանը, և մրցույթի ժամանակ առաջին հայտը պիտի լինի գերակա.
«Դիցուք՝ եթե ուսանողը դիմել է արվեստաբանության ֆակուլտետ՝ մասնագիտություն ստանալու, ապա մրցույթի ժամանակ մյուսների հետ համեմատ նա ունենալու է գերակայություն»,- ասել էր նախարարը:

Դիանա Իկիլիկյանն այս տարի առաջին հայտով դիմել է ԵՊԲՀ-ի ընդհանուր բժշկության ֆակուլտետ, կենսաբանություն առարկայի միասնական քննությունից ստացել է 14.75 միավոր, որը չի բավարարել իր առաջին հայտով նշած բաժինն ընդունվելուն: Դիանան չի ընդունվել նաև իր երկրորդ և երրորդ հայտերով, քանի որ տվյալ բաժիններում տեղերը լրացած են եղել:
«12 միավորով լրացել են ստոմատոլոգիական ֆակուլտետի տեղերը, 7.5 միավորներով էլ լրացել են դեղագիտական ֆակուլտետի տեղերը»,- նշեց դիմորդի ծնողը՝ Էմիլյա Դավթյանը: Արդյունքում՝ Դիանա Իկիլիկյանը չի ընդունվել բուհ:
Ծնողը վրդովված նշում է, որ առաջին հայտի գերակայության մասին կետը նշված է եղել ընդունելության կարգի 58-րդ կետով.
«Սկզբից անիմաստ տեղեկություն էր գրված, որը նման լարված պահին անհնար էր կարդալը, իսկ այդ կետը վերջում էր՝ 58-րդը: Ոնց որ բանկի պայմանագիրը, ո՞վ է կարդում մինչև վերջ»,- նշեց ծնողը: Նա ասաց, որ տեսահոլովակի մեջ, որտեղ բացատրվում էր առցանց դիմում-հայտ լրացնելու ձևը, ոչինչ չի ասվում այս մասին:

Ի պատասխան այս պնդումների՝ նախարարությունից հայտարարում են, որ դիմորդը նշել է «Ես ծանոթ եմ ընդունելության կարգին» կոճակը, որտեղ այս մասին գրված է եղել, բացի այդ՝ նախարարությունն ասում է, որ պատշաճ իրազեկում կազմակերպվել է իրենց կողմից:

Մի քանի օր տևած բողոքի ակցիաներից հետո ԿԳՄՍ նախարարի տեղակալ Գրիշա Թամրազյանը հանդիպեց ակցիայի մասնակիցների հետ, որից հետո ԿԳՄՍ-ն հանդես եկավ հայտարարությամբ, ըստ որի՝ դրական միավորներ հավաքած, բայց բուհեր չընդունված ուսանողները ընդունելության լրացուցիչ փուլին մասնակցելու հնարավորությունից բացի, կկարողանան դիմել բուհերի հեռակա համակարգում սովորելու՝ առանց քննության: Ըստ նախարարության՝ դրական միավորներով չընդունված շուրջ 739 դիմորդից 550-ը դիմել է ընդունելության լրացուցիչ փուլին, որն անցկացվում է ըստ առկա համակարգի թափուր տեղերի:
Դրական միավորներով բուհեր չընդունված ուսանողների մեջ եղել են նաև այնպիսիք, որոնք ստացել են 18 և բարձր միավորներ: Գերազանց միավորներ ստացած այդ դիմորդներին, որոնք 6-ն են, առաջարկվել է իրենց դիմում- հայտերի հաջորդ կրթական ծրագրերին համապատասխան լուծումներ նախարարության կողմից: Դիմորդներից 4-ը համաձայնել են:
Իսկ մնացած դիմորդներին, ովքեր մրցույթից դուրս են մնացել և լրցուցիչ փուլին էլ չեն դիմել, նախարարությունն իր այսօրվա հայտարարությունով առաջարկում է դիմել հեռակա ուսուցման համակարգ:

Մեր հերոսի՝ Դիանա Իկիլիկյանի ծնողը մեզ հայտնեց՝ քանի որ ԵՊԲՀ-ում հեռակա կրթություն չկա,  լրացուցիչ փուլով դիմել են երկու ոչ պետական բուհեր.
 «Բայց ես չեմ ուզում, որ իմ երեխան ոչ պետական հաստատությունում սովորելու պիտակն ունենա, բացի այդ՝ ԵՊԲՀ-ի կրթական որակն ավելի բարձր է»,- ասաց Էմիլյա Դավթյանը: Նա նշեց, որ պայքարելու են մինչև վերջ, որ նախարարությունը լրացուցիչ տեղեր ավելացնի դիմորդների համար:

Բողոքի ակցիաները շարունակվում են, նախարարությունն այլ հայտարարությամբ դեռևս հանդես չի եկել՝ կապված այս խնդրի հետ:

Իսկ թե արդյոք ԿԳՄՍ-ն պատրաստվում է գալիք տարվա ընդունելության կարգի մեջ փոփոխություններ մտցնել՝ նման խնդիրներ չառաջանալու համար, նախարարության հասարակայնության հետ կապերի և տեղեկատվության վարչության պետի տեղակալ Օֆելյա Կամավոսյանը մեզ ասաց, որ եկող տարվա համար հստակ ասելը ճիշտ չի լինի.
«Բայց մոտեցումն այն է, որ շրջանավարտները, դիմորդները պետք է կատարեն իրենց մասնագիտական ընտրությունը և այդպիսով դիմեն բուհ»,- պարզաբանեց Օֆելյա Կամավոսյանը:

Հեղինակ՝ Լուսինե Հակոբյան

Կիսվել