Սեպտեմբերի 8-ին Կինոարվեստի և գիտության ակադեմիան հրապարակեց նոր ուղեցույց «Լավագույն կինոնկար» մրցանակին հավակնող ֆիլմերի համար։ Նոր չափորոշիչները բաժանվում են 4 կատեգորիաների։ «Օսկար» մրցանակաբաշխության գլխավոր անվանակարգում հաղթելու համար ֆիլմը պետք է համապատասխանի չորս կատեգորիաներից առնվազն երկուսին։
Ակադեմիան չափորոշիչները բաժանել է չորս խմբի։
Առաջին խմբի չափորոշիչները վերաբերում են սցենարին ու հերոսներին.
* Առնվազն 1 գլխավոր կամ նշանակալի օժանդակ դերասան պիտի ներկայացնի էթնիկ կամ ռասսայական փոքրամասնություն, կամ
* Երկրորդական կամ ավելի փոքր դերերում դերասանական կազմի առնվազն 30%-ը պիտի ներկայացնի էթնիկ փոքրամասնություն, կամ
* Պետք է լինի հիմնական պատմություն կամ առարկա, որ կկենտրոնանա թերի ներկայացված ինքնության խմբերի վրա։
![](https://journalist.am/wp-content/uploads/2020/09/2-14-1024x682.jpg)
Երկրորդ խմբի չափորոշիչները վերաբերում են ստեղծագործական թիմին.
* Մեծ բաժինների առնվազն երկու ղեկավարներ, ինչպիսիք են՝ խմբագիր, ռեժիսոր, դիմահարդար և վարսահարդար, դիզայներ, ձայնային ռեժիսոր, պետք է լինեն թերի ներկայացված ինքնության ներկայացուցիչ, իսկ նրանցից գոնե մեկը պիտի լինի էթնիկ կամ ռասսայական փոքրամասնության ներկայացուցիչ, կամ
* Անձնակազմի առնվազն վեց անդամ պետք է լինեն էթնիկ կամ ռասսայական փոքրամասնության ներկայացուցիչ, կամ
* Անձնակազմի առնվազն 30%-ը պետք է լինի էթնիկ կամ ռասսայական փոքրամասնության ներկայացուցիչ։
![](https://journalist.am/wp-content/uploads/2020/09/3-7-1024x768.jpg)
Երրորդ խմբի չափորոշիչները վերաբերում են վճարովի պրակտիկաներին, որ ֆիլմ արտադրող կազմակերպությունները առաջարկում են Հոլիվուդում թերի ներկայացված մարդկանց խմբերի։
* Կազմակերպությունները պետք է տրամադրեն վճարովի պրակտիկայի հնարավորություն տարբեր ստորաբաժանումներում թերի ներկայացված ինքնության ներկայացուցիչներին, իսկ հետո նրանց իսկապես ապահովել աշխատանքով, և
* Պետք է առաջարկեն թերի ներկայացված ինքնության ներկայացուցիչներին պրակտիկայի կամ աշխատանքի հնարավորություն ցածր կամ միջին պաշտոններում։
![](https://journalist.am/wp-content/uploads/2020/09/119060384_3194379610681752_7139407888110057093_n-1024x682.jpg)
Չորրորդ խմբի չափորոշիչները վերաբերում են «հանդիսատեսի զարգացմանը», ինչը ենթադրում է, որ ֆիլմ արտադրող կազմակերպությունների մարքեթինգի, հրապարակայնության կամ վաճառքի թիմերում պիտի ներգրավված լինեն թերի ներկայացված ինքնության ներկայացուցիչներ։
Հեղինակ՝ Լուսինե Մանվելյան