«Ընտրություններից հետո կյանք կա»,- ասաց Հայաստանի կառավարման ակադեմիայի հոգեբանության ամբիոնի վարիչ, պրոֆեսոր Ռուբեն Աղուզումցյանը մարտի 11-ին «Սպուտնիկ Արմենիա» մամլո սրահում կայացած ասուլիսի ժամանակ:
Գրեթե բոլոր ընտրողներին է հետաքրքրում, թե ինչպես կարելի է տարբերել կեղծիքն իրականությունից նախընտրական քարոզարշավի ընթացքում: Այս հարցի պատասխանն օգնեցին գտնել ասուլիսի բանախոսները: Հոգեբան Ռուբեն Աղուզումցյանը կարծում է, որ կուսակցությունները կենտրոնացած են միայն իրենց վրա և մոռանում են ընտրությունների հիմնական մասնակիցների՝ ընտրողների մասին: Բանախոսը նշեց նաև, որ քաղաքական մշակույթը Հայաստանում բարձր չէ, իսկ դա բարձրացնելու համար մի քանի ամիսը բավարար չէ. այդ մասին պետք է մտածել քաղաքականություն մտնելու հենց առաջին պահից:
«Ընտրում են անձին, և ոչ՝ կուսակցությունը, ընտրում են գաղափարը, և ոչ՝ խոստումները», – Ֆրանսիայի քաղաքական PR-ի արքա Ժակ Սեգելայի խոսքերը մեջբերեց «PR-ի զարգացման հայկական կենտրոնի» ղեկավար Հայկ Կիրակոսյանը: Վերջինիս համոզմամբ՝ ավելի պատեհ կլիներ, եթե քաղաքական գործիչներին անվանեինք քաղաքական դերասաններ: «Նրանք զբաղվում են իրենց գործերով (բիզնես , IT ոլորտ և այլն), և միայն երբ պահը հասունանում է, տրանսֆորմացվում են քաղաքական գործիչների»,- խոսքը շարունակեց Կիրակոսյանը և հավելեց, որ այդ դերասանները շատ վատ են խաղում իրենց դերերը:
Հայկ Կիրակոսյանը PR տեխնոլոգիաներից առանձնացրեց արհեստական արժևորում ստեղծելը և օրինակ բերեց այն երևույթը, որ քաղաքական գործիչներնը իրենց պաստառներն են փակցնում, ապա իրենց գործընկերների կողմից այն պատռելուց կամ սևացնելուց հետո , հայտարարում են, թե դա արել են իրենց «չուզողները»:
Իսկ կա՞, արդյոք, որևէ ժեստ կամ դեմքի միմիկա, որից կարելի է կռահել՝ տվյալ քաղաքական գործիչը ճի՞շտ է ասում, թե՞ ստում է: Այս հարցին պատասխանեց ՌԴ Ստի հետազոտման միջազգային ակադեմիայի հայաստանյան ներկայացուցիչ, պրոֆայլեր Գոռ Սարգսյանը ,- «Չկա կոնկրետ միմիկա կամ ժեստ սուտը բացահայտելու համար, ամեն ինչ պետք է կատարվի կոմպլեքս հետազոտության միջոցով»: Սարգսյանը խորհուրդ տվեց հետևել անձի վարքագծին և ուսումնասիրել այն հանգիստ վիճակում , ապա՝ սթրեսային վիճակում. յուրաքանչյուր սուտ սթրես է, իսկ ստելիս մարդու ժեստերը և միմիկաները ակնհայտորեն փոխվում են:
Ամփոփելով «Քարոզարշավ. ինչպես տարբերակել կեղծիքն իրականությունից» թեմայով ասուլիսը՝ բանախոսները խորհուրդ տվեցին ընտրողներին լինել որքան հնարավոր է տեղեկացված, շատ կարդալ և հետազոտել քաղաքական անձանց գործունեությունը, ճիշտ ընտրություն կատարելու համար:
Էլինե Պողոսյան
2-րդ կուրս
