Կորոնավիրուսի կանխարգելման նպատակով հավաքագրված անձնական տվյալները ենթակա էին ոչնչացման

Կորոնավիրուսի կանխարգելման նպատակով հավաքագրված անձնական տվյալները ենթակա էին ոչնչացման

45

Կորոնավիրուսի կանխարգելման նպատակով հավաքագրված անձնական տվյալները ենթակա էին ոչնչացման արտակարգ դրությունից հետո երկու շաբաթվա ընթացքում: Այս գործընթացին կարող էր մասնակցել մեկական ներկայացուցիչ Ազգային ժողովի խմբակցություններից` առանց տվյալները մշակելու իրավունքի: «Լուսավոր Հայաստան» կուսակցությունից գործընթացին մասնակցել է պատգամավոր Արմեն Եղիազարյանը: Մեր զրույցի ընթացքում պարոն Եղիազարյանը ներկայացրեց անձնական տվյալների ոչնչացման պրոցեսը:

-Պարետատունը ոչնչացրեց հավաքագրված անձնական տվյալները, կպատմե՞ք գործընթացի մասին, դուք ամբողջ գործընթացին մասնակցե՞լ եք: Խնդրում եմ մանրամասնեք մի փոքր:

-Իմ մասնակցությունը սկսվեց այն պահից, երբ հանձնաժողովն արդեն կազմված էր: «ԷԿԵՆԳ»-ի տնօրենը հանձնաժողովի անդամներիս ներկայացրեց, որ իրենք ինֆորմացիայի 4 կրիչները ֆիզիկապես հանել են սերվերներից, փաթեթավորել, կնքել են: Դրանք գտնվել են ԷԿԵՆԳ-ի տնօրենի չհրկիզվող պահարանում: Մեր ներկայությամբ փակ ծրարը բացեցին այնտեղից հանեցին այդ 4 կրիչները, որտեղ ամբողջ ինֆորմացիան էր կուտակված: Մեր ներկայությամբ էլ ոչնչացվեցին և՛ կրիչները, և՛ միկրոչիպերը: Սկզբից մի քանի տեղից մուրճով կոտրվեցին կրիչները, հետո կրիչներում եղած միկրոչիպերը կտրող գործիքով կտրվեցին մի քանի տեղից և ֆիզիկապես ոչնչացան: Ամբողջ պրոցեսը տեսաձայնագրվել է:

-Մասնակցելով գործընթացին` դուք համոզվեցի՞ք, որ տվյալներն ամբողջությամբ ոչնչացված են, եւ բացառվում է հետագայում դրանց օգտագործումը:

-Ես ինֆորմացիայի լիարժեք ոչնչացման հետ կապված մի քանի հարց ուղղեցի, քանի որ ինձ պետք էր երաշխիքներ ունենալ, թե արդյոք այդ ինֆորմացիան մեկ այլ տեղ չկա կրկնօրինակված: Հարցը մասնավորապես կայանում էր սերվերներում աշխատանքային պրոցեսին, այսինքն` աշխատելիս հնարավորություն չի՞ եղել ֆլեշ կրիչով այդ տվյալները կրկնօրինակել: Այն կրիչները, որոնք կային, ես վստահ կարող եմ ասել, որ հիմա չկան, այնտեղից ինչ-որ բան վերծանել հնարավոր չէ, այս մասով ամեն ինչ հստակ էր:  Այսօր ինֆորմացիայի պահպանման հազար ու մի ձև կա, ինֆորմացիոն դար է, և գիտենք, որ տարբեր ձևերով կարելի է պահպանել այն ինչ-որ տեղերում: Արդյոք ոչնչացումից առաջ եղե՞լ են կրկնօրնակումներ, այս մասով ոչինչ չեմ կարող ասել, և արձանագրությունն էլ դրա մասին պարզաբանում չի տալիս. այն միայն կրիչների ֆիզիկական ոչնչացմանն էր վերաբերում:

-Ձեր բարձրաձայնած հարցերի պատասխանները պատասխանատու անձինք չունեի՞ն:

-Այդ պահին միայն այն պատասխանը տվեցին, որ ինտերնետ հասանելիություն չի եղել, եղել է լոկալ ցանց:  Մնացած առումներով պատասխանեցին, որ տվյալներն օգտագործել են իրենց աշխատակիցները, և վստահություն հայտնեցին, որ արտահոսք չի եղել: Ես հավատում եմ այս խոսքին, բայց նաև այն, ինչն իմ աչքով չեմ տեսել, այսինքն` արտահոսքի անհնար լինելը, համոզված լինել չեմ կարող:

-Ոչնչացումն այսքան կարճ գործընթաց էր, և ավարտվեց, թե՞ շարունակական պրոցես է:

-Այո՛, ոչնչացումը ենթադրում էր կրիչների ֆիզիկական ոչնչացում, եւ այս պրոցեսն ավարտված է:

-Ամբողջ գործընթացին ներկա եղե՞լ եք:

-Ամբողջ գործընթացին ներկա եմ եղել, բայց նորից նշեմ, որ այն մտավախությունները, որ ինձ մոտ կային, ամբողջությամբ փարատված չեն:

Զարա Խաչատրյան

2-րդ կուրս

Կիսվել