Հասակը 177 սմ
Ակումբը Գրանդ–Սպորտ
Գոռը իր առաջին քայլերը կատարել է Երևանի N 191 դպրոցում բացված բասկետբոլային ակումբում: Զբաղվում է պրոֆեսիանալ բասկետբոլով 2011 թվականից: Այժմ հանդես է գալիս «Գրանդ Սպորտ» ակումբում:
-Գոռ, նախ կցանկանայի մի փոքր պատմեիր քո մասին, թե ինչպե՞ս ստացվեց, որ ընտրեցիր հենց բասկետբոլը։
-Ամենասկզից ես բասկետբոլի պարապմունքների հաճախում էի առողջ ապրելակերպի և հասակիս աճի համար: Հետո արդեն, սիրահարվելով այդ սպորտաձևին, ինձ շատ հետաքրքրեց բասկետբոլը, նրանում կատարվող շոուն և այն, որ կարողանում էր գրավել մարզադաշտում նստած հանդիսատեսին: Սերը, ձգտումը դեպի բասկետբոլը մեծացավ ինձ հետ, տարիների ընթացքում ավելի ամրապնդվեց և դարձավ իմ ապրելակերպը, առանց որի իմ կյանքը չեմ պատկերացնում:
-Կպատմե՞ս Գրանդ Սպորտի կազմում անցկացրած անցած մրցաշրջանի ելույթներից:
-Բասկետբոլում լինում են և՛ վերելքներ, և՛ անկումներ, բայց դա չի նշանակում, որ մենք չենք պայքարելու և ցույց չենք տալու գեղեցիկ խաղ, որում լինելու են բազմաթիվ հաղթանակներ: Գրանդ սպորտում անցած մրցաշրջանում ստացած վնասվածքից հետո բաց թողեցի որոշակի ժամանակահատված, սակայն վերադարձս շատ սպասեցնել չտվեց: Շնորհիվ քրտնաջան պարապմունքների՝ արագ վերադարձա և կարողացա օգնել թիմին տանել բազում հաղթանակներ:
–Դու բարձրագույն խմբում հանդես գալու արդեն բավականին փորձ ունես, ինչպե՞ս ես տրամադրվում առաջնության խաղերին:
-Յուրաքանչյուր խաղին մոտենում եմ շատ լուրջ և պրոֆեսիոնալ: Անկախ նրանից՝ խաղը կլինի ընկերական, թե պաշտոնական, ես մտնում եմ դաշտ հաղթանակի և դիտարժան բասկետբոլ խաղալու համար:
-Դու խաղադաշտում կարողանում ես գործել մի քանի դիրքերում, այնուամենայնիվ, ո՞ր դիրքում ես քեզ առավելագույնս լավ զգում։
-Բասկետբոլում կա իմ հասակին համապատասխան երեք դիրք. 1-ինը՝ խաղարկող, 2-րդը՝ հիմնական հարձակվող, 3-րդը՝ թեթև հարձակվող: Ես ինձ առավել լավ զգում եմ խաղարկողի դիրքում՝ չմոռանալով պաշտպանության մասին:
-Ո՞ր ակումբում կցանկանայի՞ր հանդես գալ հետագա կարիերայում։
-Կան շատ պրոֆեսիոնալ եվրոպական ակումբներ որտեղ կցանկանամ հանդես գալ: Նպատակ ունեմ խաղալու մասնավորապես իսպանական «Գռան Կանարիա» ակումբում:
Նարեկ Աղաջանյան
5-րդ կուրս
