ՑԱՆԿԱՑԱԾ ՊԱՐԱԳԱՅՈՒՄ ԼԻՆԵԼ ԱՐԴԱՐ

ՑԱՆԿԱՑԱԾ ՊԱՐԱԳԱՅՈՒՄ ԼԻՆԵԼ ԱՐԴԱՐ

646

Մեր զրուցակիցն է հայ ծանրամարտիկ Սիմոն Մարտիրոսյանը: Նա 2013 թվականի Եվրոպայի մինչև 17 տարեկանների առաջնության ոսկե մեդալակիր է, 2014 թվականի երկրորդ երիտասարդական օլիմպիական խաղերի չեմպիոն և ռեկորդակիր, մինչև 105 կգ քաշային կարգում 2016 թվականի Ամառային օլիմպիական խաղերի փոխչեմպիոն և 2017 թվականի Եվրոպայի չեմպիոն։

Սիմոն, երկար տարիներ է ինչ զբաղվում եք ծանրամարտով։ Ինչու՞ ընտրեցիք հենց այս մասնագիտությունը։

-Նախկինում զբաղվել եմ բոքսով, սակայն ինձ ավելի հոգեհարազատ է ծանրամարտը, այստեղ ես գտել եմ ինքս ինձ։

-Ի՞նչը կամ ո՞վ է ոգեշնչում Ձեզ ծանրաձողին մոտենալիս։

-Այն, որ ամբողջ հայ ազգը ուրախանում է և այդ պահին հպարտանում է ինձանով, հենց դա է ինձ ոգեշնչում։

– Ո՞վ է եղել ծանրամարտում Ձեր իդեալը։

-Իդեալներ որպես այդպիսին չեմ ունեցել, իսկ որպես սպորտսմեն` ինձ համար օրինակ է եղել լեգենդար Յուրի Վարդանյանը:

-Ո՞րն է Ձեզ համար ավելի դժվար՝ պարտվել կյանքում, թե պարտվել ծանրաձողին։

-Եթե պարտվեցիր կյանքում, ապա կպարտվես նաև ծանրաձողին։ Դրանք փոխկապակցված են։

-Ունեցե՞լ եք մասնագիտական դժվարություններ, որոնք կարողացել եք հաղթահարել։

-Իհարկե, եղել են դժավարություններ, բայց անհաղթահարելի ոչինչ չկա կյանքում։ Իսկական սպորտսմենը նա է, ով հաղթահարում է այդ դժվարությունները։

-Դուք ընդամենը 20 տարեկան եք, չի եղե՞լ մի պահ կյանքում, որ ցանկանաք թողնել ամեն ինչ և ապրել 20-ամյա երիտասարդի կյանքով։

-Ո՛չ, չի եղել, եթե կյանքում ընտրում ես մի ուղի, ապա պետք է հաղթահարես բոլոր խոչընդոտները և ամեն գնով հասնես նպատակիդ։

-Կյանքում ինչ-որ կարգախոս ունե՞ք, որով առաջնորդվում եք։

-Ցանկացած պարագայում լինել արդար և բարի։

-Բոլորն էլ այս կյանքում ունեն նպատակներ, որոնց ձգտում են հասնել։ Իսկ ո՞րն է այսօր Սիմոն Մարտիրոսյանի գլխավոր նպատակը։

-Գլխավոր նպատակս է դառնալ օլիմպիական չեմպիոն։

 

 

Աննա Բզնունի

2-րդ կուրս

Կիսվել