2016 թվականի ապրիլյան 4-օրյա պատերազմը ծանր հետևանքներ թողեց հայ ժողովրդի վրա։ Ապրիլի 1-ի, լույս 2-ի գիշերն Ադրբեջանը Արցախի Հանրապետության դեմ սկսեց լայնածավալ հարձակողական գործողություն՝ մարտի դաշտ նետելով իր զինանոցը։ Ապրիլի 3-ին առաջնային գծի հարավային ուղղությամբ Ադրբեջանի զինված ուժերը հրթիռահրետանային միջոցների և զրահատեխնիկայի կիրառմամբ շարունակեցին ագրեսիվ ռազմական գործողությունները, որոնց հետևանքով հերոսաբար զոհվեցին 321-րդ տանկի անձնակազմի անդամները՝ Բենիամին Եղոյանը, Տիգրան Աբգարյանը և Վլադիմիր Ալիխանյանը։
…Վլադիմիր Ալիխանյանի բնակարանում ինձ դիմավորեց հերոսի մայրը՝ տիկին Աննան: Նա անմիջապես ինձ ուղեկցեց իր որդու Պատվո և հիշատակի անկյունը: Մեծադիր լուսանկարից հերոսը պայծառ ժպտում էր, անկյունում շարված էին նրա մեդալները, իսկ մի փոքր հեռվում դրված էր զինվորական համազգեստը։
![](https://journalist.am/wp-content/uploads/2022/11/23-1-3.jpg)
Այստեղ սուգն ու հպարտությունը, ցավն ու կամքը միախառնված են, այս տանը չես կոտրվում, ընդհակառակը՝ ավելի ուժեղ ու հուսավառ ես դառնում: Զարմանալի զսպվածություն, արժանապատվություն, վեհություն կա նրանց վշտի մեջ։
-Որդիս ջերմ տղա էր, արագորեն կարողանում էր շահել մարդկանց համակրանքը: Աշխատասեր, պարտաճանաչ աշակերտ էր, լավ էր սովորում,- այսպես է իր զավակին բնութագրում տիկին Աննան:- Առհասարակ, նա հոգատար մարդ էր: Իր ուժերի չափով օգնում էր բոլորին, ովքեր օգնության կարիք ունեին:
![](https://journalist.am/wp-content/uploads/2022/11/23-1-2.jpg)
…Վլադիմիր Ալիխանյանը սովորել է Դիլիջանի պետական քոլեջի տնտեսագիտության բաժնում։ Սիրով ու լավ զինվոր դառնալու հաստատակամությամբ է մեկնել զինծառայության: Ավելին՝ որոշել էր զինվորական դառնալ, կյանքը կապել հայրենիքի սահմանների պաշտպանությանը, բայց ճակատագիրը հերոսանալու այլ ճանապարհ էր նախատեսել նրա համար: Նա պիտի անցներ ապրիլյան կռվի բոցերով ու կյանքով հավաստեր իր սերն առ հայրենիք, իր տղամարդկային պատվախնդրությունն ու ոգու ամրությունը:
…Հարազատները դեպքի մասին իմացան լուրերից: Հետո բոթը տարածվեց քաղաքով մեկ, մարդիկ սգացին ու… հպարտացան…
Երբ հրաժեշտ էի տալիս տիկին Աննային, տեսա փոքրիկ Վլադիմիր Ալիխանյանին, որը հերոսի եղբոր որդին է ու նրա անունն է կրում: Փոքրիկ Վլադիմիրը վազվզում էր ժիր ու ժպտադեմ, դիմագծերով նման էր հերոսին։ …Մի օր նա կկանգնի սահմանին ու իրականություն կդարձնի հորեղբոր բոլոր անկատար երազանքները։
Մերի Գևորգյան
2-րդ կուրս