Մեր այսօրվա հերոսուհին Մարիան է, որն ընդամենը 16 տարեկան հասակում փորձեց նպաստել սպասարկման ոլորտի աշխատանքն ավելի հեշտ ու արագ դարձնելուն: Մարիան այժմ սովորում է Հայաստանի ազգային պոլիտեխնիկական քոլեջի 3-րդ կուրսում, վեբ դիզայնի բաժնում: Նա իր կուրսային աշխատանքի շրջանակում ստեղծեց մի կայք, որը կհեշտացնի շատերի կյանքը: Կայքը ստեղծելու ժամանակ Մարիան կատարեց ուսումնասիրություններ և հասկացավ, որ սպասարկման ոլորտում մի խնդիր կա, օրինակ` գրանցումեր կատարելու համար նախապես զանգահարում են, երկար զրույցներ ունենում, իսկ դա մի փոքր բարդացնում է մարդկանց կյանքը: Եվ այդ խնդիրը լուծելու համար Մարիան որոշեց ստեղծել մի կայք, որը թույլ է տալիս ընտրել, օրինակ, որևէ գեղեցկության սրահ, նախընտրելի ժամ և գրանցվել։ Այս ամենը կարելի է կատարել մի քանի կոճակի օգնությամբ և անիմաստ ժամանակ չվատնել: Մարիան միայն այս կայքով չի սահմանափակվել։ Համագործակցել է շատ ծրագրավորողների հետ և նրանց հետ միասին շատ աշխատանքներ է կատարել:
Ստորև՝ կայքից մի քանի դետալ.
Կայքը դեռևս չի գործում` ֆինանսական խնդիրներով պայմանավորված, սակայն Մարիան նշեց, որ պատրաստ է իր ծրագիրը վաճառել մեկ այլ մարդու, որը կցանկանա կյանքի կոչել այս գաղափարը:
Մարիան հասցրել է փորձ ձեռք բերել այլ ոլորտներում ևս: Նա դեռ փոքրուց հաճախում է երաժշտական քոլեջ․ կիթառահար է: Զրույցի ընթացքում նշեց, որ խմբով շատ են մասնակցել համերգների և նույնիսկ Art Music միջազգային մրցույթում գրավել 1-ին տեղը: Թեև երաժշտական կրթությունը 5 տարի է տևում, բայց ավարտելուց հետո էլ նա չի դադարում սովորել և այժմ հաճախում է սիրողական դասերի:
Երաժշտության հետ մեկտեղ հաճախել է նաև նկարչության դասերի։ Նրա համար դա դարձել էր այնքան սիրելի զբաղմունք, որ մասնագիտության ընտրության հարցում փորձել է համատեղել ցանկությունները սիրելի զբաղմունքների հետ`ընտրելով վեբ դիզայնի բաժինը:
Հարցին, թե ինչպես է կարողանում կազմել իր օրվա գրաֆիկը, արդյոք չեն լինում բախումներ իրարից այդչափ տարբեր ոլորտների միջև, Մարիան պատասխանեց, որ փորձում է հնարավորին չափ հասցնել անելիքները և երբ հոգնում է համակարգչով աշխատելիս, անմիջապես վերցնում է կիթառն ու սկսում նվագել, քանի որ դա իր համար ասես թերապիա լինի:
«Հետագայում ցանկանում եմ շարունակել գործունեությունս գրաֆիկական դիզայնի ոլորտում, բայց կիթառը մշտապես կմնա իմ ուղեկիցը ողջ կյանքի ընթացքում, և գուցե մի օր տեսնեք ինձ էլ ավելի մեծ բեմերում: Իսկ այս հարցազրույցս թող մոտիվացիա հանդիսանա իմ տարեկիցների համար, ու նրանք ևս փորձեն ներգրավվել տարբեր ոլորտներում։ Այդպես մի քանի տարի հետո մեր երկիրը կունենա խելացի և որակյալ սերունդ»,- ասում է Մարիան:
Իրինա Արևշատյան
2-րդ կուրս
