«ԵՊՀ օրեր մարզերում». այսպես է կոչվում մայր բուհի կրթական ցուցահանդեսների շարքը, որ անցկացվում է ՀՀ մարզերում: Այն մեկնարկել է այսօր՝ Կոտայքի մարզի Հրազդան և Աբովյան քաղաքներից: Ծրագրին մասնակցում են ԵՊՀ բոլոր ֆակուլտետներն ու ստորաբաժանումները: Ժուռնալիստիկայի ֆակուլտետը ևս մասնակիցների թվում է:
Յուրաքանչյուր ստորաբաժանում ներկայացված է առանձին տաղավարով՝ ապագա դիմորդներին ներկայացնելով իր կարողություններն ու կրթության ոլորտում առաջարկները:
«Դիտակետ». այսպես է կոչվել Ժուռնալիստիկայի ֆակուլտետի տաղավարը, որը ձևավորված է եղել ուսանողական «Դիտակետ» հաղորդման հեռուստատեսային տաղավարի մոդելով:
Ցուցանդեսի ողջ ընթացքում դպրոցների տասնյակ աշակերտներ հնարավորություն են ունեցել ֆակուլտետի դասախոս Գարիկ Հարությունյանի և ուսանողուհի Օֆելյա Հարությունյանի օգնությամբ ու համակարգմամբ լրագրողական աշխատանքի առաջին փորձերը կատարել Ժուռնալիստիկայի ֆակուլտետի տաղավարում: Նրանք ծանոթացել են հարցազրույց վարելու հմտություններին, մասնագիտության յուրահատկություններին, ստացել իրենց հետաքրքրող հարցերի սպառիչ պատասխանները:
«ԵՊՀ օրեր մարզերում» ծրագիրը կանցկացվի ՀՀ-ի բոլոր մարզերում: Այն կշարունակվի մինչև մայիսի 13-ը ներառյալ:
