Սեպտեմբերի 13-ին` ժամը 19։00-ին, Երևանի առևտրի կենտրոններից մեկում տեղի ունեցավ սիրված երգիչ Արամ MP3-ի նոր տեսահոլովակի շնորհանդեսը։ Արտիստի խոսքով՝ տեսահոլովակը վերնագրված է «Սենց բան չկա», քանի որ այստեղ նա ներկայանում է անսպասելի կերպարներով։
-Վերջին շրջանում ռիթմիկ, պարային երգերն անհամեմատ քիչ են իմ երգացանկում։ Լսարանս բողոքում է, ասում են` հոգնել ենք ռոմանտիկ երգերից,- ծիծաղելով մեջբերում է Արամը։
Նրա կարծիքով՝ սա նոր հիթ կլինի և կապահովի բարձր տրամադրություն երեկույթների և միջոցառումների ընթացքում։
Երեկոյի սկզբում լավ տրամադրությունը ապահովեց DJ Arni Rock-ը, այնուհետև բեմ բարձրացավ Արամը և իր երգացանկից կատարեց «Ալաբալանիցա», «Սիրո հասակ», «Գալիս ես», «Սկսում ենք» և մի քանի այլ երգեր։
-Առաջին անգամը չէ, որ երգիս պրեմիերան այս ձևաչափով է կայանում։ Այս բեմից հնչել են նաև «Կուզես», «Երևի», «Ալաբալանիցա» և այլ երգերի առաջին նոտաները,-հավելում է երգիչը։
Նոր երգի խոսքերի հեղինակն Արամն է, տեսահոլովակի ռեժիսորը` Արամայիս Հայրապետյանը, բեմական տեսքն ապահովել է Դիանա Շատվերյանը, կազմակերպչական հարցերով զբաղվել է Նիկ Եգիբյանը։
Շնորհանդեսը մարդաշատ էր, հանդիսատեսի պարային բարձր տրամադրությունը չդադարեց ողջ երեկոյի ընթացքում։
Լուսանկարները` հեղինակի
Հեղինակ` Անի Իսկանդարյան
2-րդ կուրս
