Մարզերի երիտասարդները ձգտում են զարգացնել իրենց համայնքներն ու գյուղերը։ Նախագիծը, որի մասին խոսել ենք, նպատակ ունի զարգացնել գյուղական համայնքներում ապրող երիտասարդների առաջնորդական և կազմակերպչական հմտությունները՝ նրանց տալով գործիքներ, որոնք անհրաժեշտ են համայնքային խնդիրները լուծելու և զարգացման ծրագրեր իրականացնելու համար։ Մեծամորի երտասարդական խորհրդարանը մեկնարկում է նոր դպրոց՝ «Համայնքային առաջնորդության դպրոց», որի մասին խոսել ենք ծրագրի համակարգող Գեղամ Հայրապետյանի հետ։
-Ո՞րն է դպրոցի հիմնական նպատակը, և ինչպիսի՞ խնդիրներ եք փորձում լուծել դրա միջոցով:
-Մեր նպատակն է խթանել համայնքային մասնակցությունը և վերազինել գյուղերում ապրող երիտասարդներին առաջնորդական և կազմակերպչական հմտություններով: Գյուղական համայնքներում հաճախ երիտասարդների ձայնը քիչ է լսվում, և մենք ցանկանում ենք փոխել դա՝ տալով նրանց անհրաժեշտ գործիքներ, որպեսզի նրանք կարողանան դառնալ իրենց համայնքների դրական փոփոխության շարժիչ ուժերը:
-Ինչպե՞ս է կազմակերպված դպրոցի ուսումնական ծրագիրը և արդյոք այն ուղղված է հատուկ հոսքերի կամ ոլորտների զարգացմանը:
-Դպրոցն ունենալու է մի քանի հոսքեր՝ կախված մասնակիցների քանակից: Դասընթացները լինելու են տարբեր թեմաներով՝ համայնքային առաջնորդություն, ժամանակի կառավարում, մարդկային ռեսուրսների կառավարում, ունենալու ենք տարբեր հանդիպումներ, համայնքային և մարզային իշխանությունների հետ։
-Ի՞նչ ազդեցություն եք ակնկալում ունենալ համայնքների վրա «դպրոցի» միջոցով և ինչպե՞ս է դա նպաստելու գյուղերի երիտասարդների զարգացմանը:
-Մենք ակնկալում ենք, որ դպրոցը կդառնա հարթակ, որտեղ երիտասարդները կսովորեն ճանաչել իրենց համայնքների խնդիրները և մշակել լուծումներ: Ծրագիրն ուղղված է ոչ միայն նրանց հմտությունների զարգացմանը, այլ նաև ինքնավստահության ու առաջնորդության բնազդի ձևավորմանը, որը կօգնի նրանց հետագայում կատարելագործվել իրենց համայնքներում:
-Նշեցիք, որ այցեր են լինելու, ինչպիսի՞ համագործակցություն եք նախատեսել համայնքների ղեկավարների, ձեռնարկությունների կամ այլ կազմակերպությունների հետ՝ դպրոցի արդյունավետությունը բարձրացնելու նպատակով:
-Մենք համագործակցում ենք Մեծամորի համայնքապետարանի, Արմավիրի մարզպետարանի և ՀՀ ԿԳՄՍՆ-ի հետ՝ ծրագրի ավելի լայն ընդգրկվածություն ապահովելու համար: Այս գործընկերությունները կարևոր են, քանի որ նրանք թույլ են տալիս մեր մասնակիցներին իրականացնել իրենց գաղափարները իրական կյանքում:
-Ինչպե՞ս կարող են երիտասարդները մասնակցել ծրագրին, և ի՞նչ չափանիշներով են ընտրվում մասնակիցները:
-Ծրագրին մասնակցելու համար անհրաժեշտ է լրացնել հայտադիմում, որտեղ պետք է ներկայացնել համայնքային ներգրավվածությունը և հետաքրքրությունները: Մասնակիցները կընտրվեն՝ հիմնվելով իրենց համայնքային ակտիվության, նպատակների և առաջնորդական պոտենցիալի վրա:
-Որտե՞ղ եք տեսնում համայնքային առաջնորդության դպրոցի ապագան և ի՞նչ հեռանկարներ եք կանխատեսում դրա զարգացման համար:
– Մենք հուսով ենք, որ սա կդառնա շարունակական նախագիծ, որը կներգրավի ավելի մեծ թվով մասնակիցների: Մեր նպատակն է ստեղծել կայուն ուսումնական հարթակ, որը երկարաժամկետ կտրվածքով կկարողանա վերափոխել համայնքային զարգացումը և ակտիվացնել երիտասարդությանը:
Հարցազրույցը՝ Շողեր Ղլիջյանի
3-րդ կուրս
