«Նորաձևությունը՝ որպես մշակույթի և ինքնության արտացոլում». հարցազրույց Աննա Սարգսյանի հետ

Աննա Սարգսյանն այն դիզայներներն է, ով հայկական նորաձևությունը դարձնում է համաշխարհային մակարդակի քննարկման առարկա։ Նրա աշխատանքները հաճախ աչքի են ընկնում գույների և նյութերի խիզախ համադրություններով, որոնք խորհրդանշում են Հայաստանի մշակութային ժառանգությունն ու ժամանակակից նորաձևության միտումները։

-Աննա, ինչպե՞ս սկսեց ձեր ուղին նորաձևության աշխարհում։

-Ամեն ինչ սկսվեց դեռ մանկուց։ Ես միշտ սիրում էի նկարել և ստեղծել։ Երբ փոքր էի, մայրս հին զգեստներից կտորներ էր տալիս ինձ, որոնցից ես փորձում էի նոր բաներ կարել։ Այդ ժամանակ դեռ չգիտեի, որ դա ինձ կբերի նորաձևության աշխարհ, բայց միշտ երազել եմ իմ սեփական ստեղծագործությունները տեսնել։

-Ձեր վերջին հավաքածուն մեծ հետաքրքրություն առաջացրեց։ Ինչպե՞ս է դա ստեղծվել և ինչպե՞ս է այն արտացոլում հայկական մշակույթը։

-Այդ հավաքածուն շատ անձնական է ինձ համար։ Ես ցանկացա ստեղծել մի բան, որը կարտացոլի իմ ժողովրդի պատմությունը և գույները։ Օգտագործել եմ ավանդական հայկական գույները՝ կարմիր, կապույտ և կանաչ, որոնք խորհրդանշում են մեր մշակույթը և հույսը դեպի ապագա։ Յուրաքանչյուր զգեստ պատմություն է պատմում՝ մեր անցյալի և ներկայի միջև կամուրջ կառուցելով։

-Ձեր աշխատանքներում հաճախ կարելի է տեսնել ավանդույթի և նորարարության համադրություն։ Ինչպե՞ս եք գտնում այդ հավասարակշռությունը։

-Ես կարծում եմ, որ նորաձևությունը պետք է արտահայտի թե՛ մեր անցյալը, թե՛ մեր ներկան։ Ավանդույթները մեր ինքնության կարևոր մասն են, բայց մենք պետք է չվախենանք դրանք ներկայացնել ժամանակակից ձևով։ Իմ աշխատանքներում փորձում եմ կոտրել սահմանները, բայց չկորցնել իմ արմատները։

-Դուք հաճախ ներկայացնում եք նորաձևությունը որպես մշակույթի արտացոլման միջոց։ Ի՞նչ դեր ունի մշակույթը ձեր ստեղծագործություններում։

-Մշակույթը նորաձևության մեջ այն հիմքն է, որից ես սկսում եմ։ Ամեն հավաքածուի մեջ փորձում եմ փոխանցել մեր պատմությունը, մեր ավանդույթները, բայց այնպիսի ձևով, որ հասկանալի լինի նաև ժամանակակից հասարակությանը։ Նորաձևությունը կարող է լինել կամուրջ՝ տարբեր ժամանակների և մշակույթների միջև, և ես դա փորձում եմ արտահայտել իմ աշխատանքներում։

-Ի՞նչ ազդեցություն է թողնում ձեր հավաքածուների վրա Հայաստանի հարուստ պատմությունը։

-Հայաստանի պատմությունը մեծ ազդեցություն է ունենում իմ ստեղծագործությունների վրա։ Մեր ժառանգությունը, ավանդական գորգերը, ճարտարապետությունը, դեկորատիվ արվեստը՝ այս բոլորը ոգեշնչման աղբյուրներ են ինձ համար։ Օրինակ՝ վերջին հավաքածուում ես օգտագործել եմ գորգերի ձևավորումից ներշնչված նախշեր, որոնք արտահայտում են դարավոր ավանդույթները և միևնույն ժամանակ նորաձև են ժամանակակից դիզայնի համատեքստում։

-Ձեր կարծիքով, ինչպե՞ս է նորաձևությունը փոխում մարդկանց և նրանց ինքնության ընկալումը։

-Նորաձևությունը ոչ միայն արտաքնապես է գեղեցկացնում մարդուն, այն տալիս է ինքնավստահություն։ Երբ մարդիկ կրում են մի բան, որը արտահայտում է իրենց ոճը կամ զգացմունքները, նրանք ավելի ինքնավստահ են զգում։ Նորաձևությունը նաև ինքնարտահայտման ձև է, և դրա միջոցով մարդիկ կարող են արտահայտել իրենց մշակույթը, արժեքները և տեսակետները։

-Ի՞նչ նպատակներ եք դրել Ձեր առաջ, և որտե՞ղ եք տեսնում Ձեզ առաջիկա տարիներին։

-Ես նպատակ ունեմ նորաձևության ոլորտում Հայաստանի անունը ավելի լսելի դարձնել։ Ուզում եմ, որ մեր դիզայներական աշխատանքները ներկայացվեն աշխարհի տարբեր անկյուններում։ Ապագա ծրագրերում ներառում եմ նաև էկոլոգիապես պատասխանատու նորարարություններ՝ օգտագործելով բնական նյութեր։ Նպատակս է ստեղծել նորաձևություն, որը կլինի և՛ գեղեցիկ, և՛ կայուն։

Հարցազրույցը՝ Լյուդմիլա Սարգսյանի

2-րդ կուրս