«ՀՀ կառավարության մինչև 2050 թվականի ռազմավարության մեջ խնդիր ենք դրել, որ ՀՀ ֆուտբոլի հավաքականը դառնա Եվրոպայի կամ Աշխարհի առաջնության մրցանակակիր, որն իրագործելի ծրագիր է։ Բայց դրա համար մենք պետք է հասկանանք, թե ինչ պետք է անենք։ Իրատեսականությունը խիստ հաշվարկելի է։ Դա կախված է նրանից, թե մենք ինչ ենթակառուցվածքներ ունենք, քանի երեխա է զբաղվում ֆուտբոլով»,- Նիկոլ Փաշինյան։
Վարչապետ Նիկոլ Փաշինյանի այս հայտարարությունից (2022 թ. դեկտեմբերի 25) անցել է գրեթե 2 տարի, սակայն ֆուտբոլում զարգացման փոխարեն տեղի է ունենում հետընթաց․ ազգային և տարբեր տարիքային հավաքականները շարունակում են իրենց անկայուն ելույթները, իսկ ազգային ընտրանին ՈՒԵՖԱ-ի դասակարգման աղյուսակում 211 թիմերի մեջ «պատվավոր» 99-րդ տեղում է: Թվերն առավել քան խոսուն են:
| Անցկացված պաշտոնական խաղերը 2022/24 թ.-ին | Հաղթանակներ | Ոչ-ոքիներ | Պարտություններ | Խփած գոլեր | Բաց թողած գոլեր | |
| Ազգային հավաքական | 18 | 4 | 3 | 11 | 19 | 35 |
| Մ-21 հավաքական | 14 | 0 | 2 | 12 | 4 | 32 |
| Մ-19 հավաքական | 9 | 0 | 1 | 8 | 4 | 24 |
| Մ-17 հավաքական | 9 | 0 | 0 | 9 | 4 | 44 |
Տվյալները՝ www.flashscore.com
Հայաստանում ֆուտբոլի զարգացման ռազմավարության մշակումն ու իրականացումը վստահված է Հայաստանի Ֆուտբոլի Ֆեդերացիային. այն անկախ կառույց է, որը ղեկավարվում է ՀՖՖ նախագահի և գործկոմի կողմից:
ՀՖՖ գործող նախագահը Արմեն Մելիքբեկյանն է, որը պաշտոնը ստանձնել է 2019 թվականին՝ ՀՖՖ նախագահի ընտրություններում հաղթելուց հետո, իսկ նախորդ տարի դեկտեմբերին վերընտրվել ևս 5 տարով:
2019 թվականին զբաղեցնելով ՀՖՖ նախագահի պաշտոնը՝ Արմեն Մելիքբեկյանն իր առջև դրեց պատվախնդիր նպատակներ, այն է` ունենալ մրցունակ ազգային և մանկապատանեկան տարբեր տարիքային հավաքականներ, որոնք մինչև 2025 թվականը պետք է որակավորվեն Աշխարհի կամ Եվրոպայի առաջնության եզրափակիչ փուլերին, նոր տեխնիկական կենտրոնի և 4 նոր մարզադաշտերի կառուցում և շատ այլ հետաքրքրիր գաղափարներ, որոնց իրագործման դեպքում hայկական ֆուտբոլը պետք է զարգացում ապրեր:
Տվյալները՝ www.ffa.am/hy/1575533835
Սակայն հաջորդող 5 տարիները ցույց են տալիս, որ դրական որևէ տեղաշարժ չկա, և այժմ ունենք անկայուն ազգային հավաքական, որտեղ մարզչական նշանակումներն ու հեռացումները դարձել են սովորական (Արմեն Մելիքբեկայնի նախագահության օրոք հավաքականը գլխավորել են 2 օտարազգի մասնագետներ՝ Խոակին Կապարոսը և Ալեքսանդր Պետրակովը, որոնք իրենց զբաղեցրած պաշտոնից հեռացվել են անբավարար արդյունքների պատճառով), երիտասարդական և մանկապատանեկան հավաքականներ, որոնք իրենց խաղերն ավարտում են գերխոշոր պարտություններով, չունենք նոր տեխնիկական կենտրոն, նոր մարզադաշտեր. շարքը կարելի է երկար շարունակել:
Դեպքերի նման հանգուցալուծումը բերել է այն բանին, որ Հայաստանի ազգային հավաքականի ֆան շարժումը՝ «FAF»-ը, պահանջում է ՀՖՖ նախագահ Արմեն Մելիքբեկյանի հրաժարականը:
FAF-ի պահանջին են միացել նաև հայկական ակումբային ֆուտբոլի ֆան շարժումները՝ «South West Ultras» – (Ուրարտու), «Sector 18» – (Փյունիկ), Alfa – (Արարատ Արմենիա) և «Սև հովազներ» – (Շիրակ), ինչպես նաև հավաքականի «Red Eagles» ֆան ակումբը:
Հայտարարությունից օրեր անց Արմեն Մելիքբեկյանը հանդես եկավ պաշտոնական հայտարարությամբ, որտեղ մասնավորապես նշվում էր. «Ընտրվելուցս ընդամենը 2 ամիս անց երկար ժամանակով ամբողջ աշխարհն ուղղակի անշարժացավ կորոնավիրուսի պատճառով, իսկ հետո սկսվեց 44-օրյա պատերազմը՝ իր ծանրագույն հետևանքներով մեր երկրի համար: 2022-ին սկսվեց հակամարտությունն Ուկրաինայում, որն ամբողջությամբ ձևափոխել է համաշխարհային գրեթե բոլոր իրողությունները՝ ֆուտբոլի դեպքում խնդիր դարձնելով անգամ թիմերի տեղաշարժը։ Արտարժույթի շուկայի ձևափոխումն էլ լուրջ հարված է հասցրել ֆինանսական կայունությանը, և հայկական ֆուտբոլն այս ընթացքում չի ստացել այն բոլոր ռեսուրսները, ակնկալվող եկամուտները, որոնք կապահովեին ռազմավարական կետերի մեծ մասի իրականացումը»:
Այս հայտարարությունից հետո «FAF»-ը և մնացած բոլոր ֆան ակումբները հանդես եկան բողոքի ակցիայով՝ օգտագործելով ծակ ու ցեխոտ գնդակը:
Տեսանյութի հղումը ստորև՝
www.facebook.com/FirstArmenianFront/videos/1417053562585288
Նույն մեթոդը 2018 թվականին կիրառել էր Նիկոլ Փաշինյանը՝ պահանջելով այն ժամանակ ՀՖՖ նախագահի պաշտոնը զբաղեցնող Ռուբեն Հայրապետյանի հրաժարականը՝ նշելով, որ այդ գնդակը խորհրդանշում է հայկական ֆուտբոլի վիճակը:
Տեսանյութի հղումը ստորև՝
www.youtube.com/watch?v=Lr5cmNNtuxM
Գևորգ Թովմասյան
3-րդ կուրս
