Մեդիագրագիտության շաբաթը Երևանի Պետական Համալսարանի Ժուռնալիստիկայի ֆակուլտետում սկսվեց ֆակուլտետի Ուսանողական Խորհրդի կողմից նախաձեռնած «Հարթակ 0» նախագծով:
Ծրագրի ընթացքում Երևանի 4 բուհերի (ԵՊՀ, Երևանի Խ. Աբովյանի պետական մանկավարժական համալսարան, Վ. Բրյուսովի անվան պետական համալսարան, Եվրասիա Միջազգային Համալսարան) ժուռնալիստիկայի ֆակուլտետի ուսանողներ սկսեցին ուսումնասիրել լրագրության ամենահետաքրքիր ուղղությունները՝ ռազմական լրագրությունից մինչև մեդիագրագիտություն:
Ծրագրի հիմնադիր Միշա Եթումյանը նախագիծը համարում է անձնական փորձի փոխանակման միջոց` հնարավորություն տալով տարբեր համալսարանների նույն ֆակուլտետում սովորող ուսանողներին կիսվել իրենց անցած ուղով.
«Ընդհանրապես, ՀՀ անկախության պատմության մեջ առաջին անգամ է ստեղծվում այնպիսի ծրագիր, որում միմյանց հետ համագործակցում են ոչ թե համալսարանները, այլ համալսարանների ֆակուլտետները: Մեր առաջնային նպատակն է միավորել ուսանողներին տարբեր բուհերից, ստեղծել մի միջավայր, որտեղ նրանք կարող են կիսվել իրենց փորձով, նոր հմտություններով և ավելի խորացնել իրենց մասնագիտական գիտելիքները»:
Այս տարի ծրագրին մասնակցում են 40-ից ավել ուսանողներ: Յուրաքանչյուր բուհից ընտրվել է տասը ուսանող, ովքեր կանցկացնեն մեդիագրագիտության շաբաթը մասնագիտական գիտելիքներով լի:
«Մենք վստահ ենք, որ հենց այս փոխհարաբերություններում ծնվում է այն փորձը, որը կտանի լրագրության ապագան դեպի նոր, ավելի բարդ ու համարձակ ուղիներ: «Հարթակ 0»-ն այն առաջին քայլն է, որ մենք անում ենք միասին՝ կառուցելով միջբուհական ու մասնագիտական ամուր կապեր, որոնք կմիավորեն մեզ ու կպահպանեն մեր մասնագիտական արժեքները»,- հավելեց Միշան:
Նշենք, որ օրվա մեկնարկը տրվեց «Իրավական լրագրություն և գովազդ» դասընթացով, որի ժամանակ բանախոս Վարդուհի Պետրոսյանը ներկայացրեց իրավական լրագրության առանձնահատկությունները և գովազդի կարգավորման օրենքները:
Նկարները` ԵՊՀ Ժուռնալիստիկայի ֆ.-ի ՈւԽ-ի
Անի Սայադյան
2-րդ կուրս
