ԵՊՀ ժուռնալիստիկայի ֆակուլտետում անցկացվեց սեմինար, որի ընթացքում առաջին կուրսի ուսանողներին ներկայացվեցին միջազգային «Local media matters» ծրագիրը, մի շարք երիտասարդական հնարավորություններ և մեդիա նախագծեր: Սեմինարը նախաձեռնել էր «EduHub» կազմակերպությունը:
Կազմակերպության ներկայացուցիչներ Գևորգ Հարությունյանը, Արև Տատինցյանը և ֆակուլտետի շրջանավարտ, լրագրող Սոնա Գրիգորյանը ուսանողների հետ քննարկեցին տեղական մեդիայի զարգացման ուղիները և դրանում ապագա լրագրողների կարևոր դերը։
Հանդիպման ընթացքում ցուցադրվեց նաև գերմանացի լրագրող, Մեդիայի եւ հաղորդակցության քաղաքականության ինստիտուտի տնօրեն, դոկտոր Լեոնարդ Նովիի տեսաուղերձը։ Նա ողջունեց ուսանողներին և խոսեց լրագրության կարևորության, ժողովրդավարության մեջ դրա առանցքային դերի մասին:
«Առանց լրագրության ժողովրդավարություն լինել չի կարող, լրագրողները մեր համայնքի հենասյունն են։ Լրագրության զարգացումը նպաստում է նաեւ ժողովրդավարության զարգացմանը»,- նշեց Նովին:
Տեսաուղերձից հետո ուսանողները ներկայացրին իրենց պատկերացումները խոսքի ազատության, ժողովրդավարության և ժամանակակից լրագրության վերաբերյալ:
Թե որն է «EduHub» կազմակերպության գործունեության նպատակը և «Local Media Matters» ծրագրի գաղափարը, մանրամասնեց Գևորգ Հարությունյանը.
«2016-ին սկսեցի նախաձեռնություն, որն ուղղված էր կրթությունն ու մշակույթը մարզերում զարգացնելուն: Փոքր ավտոբուսով շրջում էինք Հայաստանի մարզերում եւ սեմինարներ անցկացնում։ 2017-ին ծրագրի գաղափարն արժանացավ իտալական մրցույթի երկրորդ հորիզոնականին: 2018-ին պաշտոնապես մեկնարկեցի ծրագիրս: Դոկտոր Լեոնարդ Նովիի հետ համագործակցության շնորհիվ 2024-ին Գերմանիայի Արտաքին գործերի նախարարությունը ֆինանսավորում տրամադրեց և նրանց բարձր հովանու ներքո մի շարք երկրներում անցկացրինք սեմինարներ՝ տեղական լրագրության զարգացմանը միտված», – ասաց նա։
Գևորգ Հարությունյանի խոսքով՝ «EduHub»-ը հավատարիմ է իր առաքելությանը, շարունակում է նոր կրթական հնարավորություններ ստեղծել երիտասարդների համար և իրականացնել ոչ ֆորմալ, նորարարական ծրագրեր: Այս առումով իրենց ուշադրության կենտրոնում է նաև ուսանողների հետ անմիջական շփումը, որպեսզի հետագայում նրանց ևս մասնակից դարձնեն մեդիայի զարգացմանն ուղղված ծրագրերին:
Միլենա Միրզոյան
1-ին կուրս
