Ժամանակի հետ ամեն բան փոփոխվում է։ Մեր օրերում կան բոլոր հնարավորությունները՝ անհնարը հնարավոր դարձնելու համար։ Մարդու՝ կատարելության հասնելու ձգտումը 21-րդ դարում հանգեցրեց նրան, որ այսօր հնարավոր է պլաստիկ վիրաբուժության միջոցով շտկել կամ լիովին վերափոխել արտաքինը։
Հայաստանը պլաստիկ վիրահատությունների քանակով վերջին մի քանի տարիների ընթացքում բավականին առաջ է անցել։ Պլաստիկ վիրաբույժների խոսքով հիմնական այցելուները 18-ից 35 տարեկան աղջիկներն են, որոնց մեծամասնությունը չունի առողջական խնդիր և պատրաստվում է կատարել վիրահատություն՝ արտաքինը էլ ավելի կատարյալ դարձնելու համար։
Պլաստիկ վիրաբույժ Կարեն Պետրոսյանի դիտարկումներով, առաջին տեղում քթի պլաստիկան է, երկրորդ տեղում` ականջների, դեմքի տարբեր տեսակի շտկումները, դրանց հետեւում են կրծքերի վիրահատությունները եւ լիպոսակցիան: Արվում է նաեւ սեռի կորեկցիա:
Պլաստիկ վիրահատությունների զգալի առաջընթացը Հայաստանում պայմանավորվում է նոր տեխնոլոգիաների զարգացման և ընտրության բազմազանւթյան հետ։ Մեր օրերում մեզնից յուրաքանչյուրը կարող է ստանալ իր երազած կառուցվածքն ու արտաքինը։ Սակայն այստեղ կա վիրահատությունից առաջ՝ հոգեբանական լուրջ խորհրդատվության անհրաժեշտություն։
Շատ են հանդիպում դեպքեր, երբ մարդկանց մոտ լինում է ցածր ինքնագնահատական և թերարժեքության ինքնազգացողություն։ Այս ամենի հետևանքով մարդու մոտ կարող է առաջանալ պլաստիկ վիրահատության դիմելու ցանկություն, բայց ամենևին չլինի դրա կարիքը։ Իսկ այս և նմանատիպ այլ բարդույթներից ազատվել կօգնի միայն հոգեբանը։
Մեր օրերում պլաստիկան դարձել է կոսմետոլոգիական ծառայություն և նույնիսկ անտեսանլի կամ չնչին խնդրի դեպքում մարդիկ պատրաստ են ծախսել մի քանի հարյուր հազարներ, որպեսզի իրենց կառուցվածքով և արտաքինով չզիջեն արտասահմանյան մի շարք հայտնի աստղերի։
Հոգեբան Սոնա Գրիգորյանը խորհուրդ է տալիս․«Մի՛ տարվեք նմանատիպ աստղային հիվանդություններով և փորձեք միայն առողջ ապրելակերպով շտկել ձեր մարմնի թերությունները։ Դրա համար շատ լավ միջոց է լողը և յոգան»։
Հոգեբանը վերջում ավելացրեց նաև, որ պետք չէ թերագնահատել ձեր անձը, քանի որ Աստված մեզ ստեղծել է այնպիսին ինչպիսին կանք, և յուրաքանչյուրս այս աշխարհում ունենք մեր առաքելությունը։
Ադրինե Նիդելյան
3-րդ կուրս
