14 – ամյա Արման Բարսեղյանը սովորում է Թալինի թիվ մեկ հիմնական դպրոցի 9 – րդ դասարանում։ Ընդամենը չորս տարեկանից սեր ունենալով դեպի համակարգիչը և հետաքրքրվելով համակարգչային ծրագրերով՝ նա այսօր կարողացավ հաջողության հասնել. ստեղծեց 3D մոդելներ, անիմացիաներ, իսկ վերջերս մշակեց լրացված իրականության Zoomar հավելվածը, որի օգնությամբ հնարավոր է կենդանացնել պատկերները։ Հավելվածը հնարավոր է Google play – ից ներբեռնել , շուտով հասանելի կլինի նաև iOS տարբերակը։
-Արման, երբվանի՞ց ես հաճախում «Արմաթ» ինժեներական խմբակ և ինչպե՞ս որոշեցիր հաճախել ։
-Երկու տարի է հաճախում եմ «Արմաթ», փոքր ժամանակվանից ուզում էի ծրագրավորող դառնալ. առաջին անգամ ընկերս է ինձ տարել խմբակ և օգնել, որ գրանցվեմ։
-Ինչպե՞ս եղավ, որ հենց ծրագրավորմամբ հետաքրքրվեցիր։
-Փոքր ժամանակվանից համակարգչային խաղեր էի խաղում, ֆոտոշոփ էի սովորում և վիդեո մոնտաժ. 4 տարեկանից ձևավորվեց սերը ծրագրավորման և համակարգչի հանդեպ։
-Իսկ ծնողներդ չէի՞ն զայրանում, որ ամեն ինչ թողած համակարգչով էիր զբաղվում։
-Զայրանում էին ու չէին թողնում, որ շատ նստեմ համակարգչի առջև, բայց քանի որ շատ էի ուզում, գաղտնի կամ մեկ այլ ձևով միացնում էի համակարգիչը։
-Բացի ծրագրավորումից ուրիշ հետաքրքրություններ ունե՞ս ։
-Եթե անգլերեն լեզուն կհամարվի առանձին հետաքրքրություն, ապա՝ այո, ինչպես նաև քիմիական փորձեր եմ սիրում անել։
-Ձեր ընտանիքում եղե՞լ են ծրագրավորմամբ հետաքրքրվողներ ։
-Ոչ, մայրս քիմիայի ուսուցչուհի է, հայրս՝ խոհարար։ Ծրագրավորողներ չեն եղել։
–Արման, որո՞նք են քո սիրելի առարկաները դպրոցում։
-Կենսաբանություն, քիմիա, անգլերեն, մաթեմատիկա, ֆրանսերեն, հասարակագիտություն։
-«Արմաթ»- ից բացի ուրիշ խմբակներ հաճախո՞ւմ ես։
-Հաճախում եմ իմփաքտի, Ֆրանսերենի և շահերի պաշտպանության։
-Եվ կարողանո՞ւմ ես բոլորը համատեղել ։
-Այո, հասցնում եմ ։
-Երբ առաջին անգամ գնացիր «Արմաթ» , ի՞նչ տպավորություններ ունեիր։
-Քանի որ « Արմաթ » -ում հիմնականում ռոբոտներ էին հավաքում, սկզբում այդքան էլ չոգևորվեցի, բայց երբ անցանք ծրագրավորմանը, սկսեցի սիրել մեր խմբակը։
-Առաջին լուրջ աշխատանքդ ո՞րն է եղել։
-3D մոդելներս և անիմացիաներս։
-Ինչպե՞ս առաջացավ Zoomar մշակելու գաղափարը:
-Քանի որ AR տեխնոլոգիաները գնալով զարգանում էին, որոշեցի ինքս էլ ստեղծեմ AR հավելված։ Համացանցից և Youtube-ից կարողացա քիչ քանակությամբ նյութեր հավաքել, նայել, սովորել և Արման Աթոյանի խորհրդով ստեղծեցի հավելվածը և ստացվեց։
-Դպրոցն ավարտելուց հետո ի՞նչ ծրագրեր ունես։
-Հիմնական դպրոցն ավարտելուց հետո կգնամ ավագ դպրոց, որից հետո Ամերիկյան համալսարան կամ ԵՊՀ։
-Իսկ մասնագիտությունդ և՞ս կապված է լինելու ծրագրավորման հետ։
-Այո, ծրագրավորում, իսկ Հայաստանում սովորելուց հետո երազանք ունեմ ԱՄՆ – ում սովորելու՝ Մասաչուսեթսի համալսարանում։
-Ինչու՞ հենց այնտեղ։
-Իմ երազանքների համալսարանն է , առանձին նախատեսված է նորագույն տեխնոլոգիաների համար։ Աշխարհի հաջողակ մարդիկ սովորել են Մասաչուսեթսում։
-Վերադառնալու նպատակո՞վ ես գնալու։
-Այո, իհարկե։
-Zoomar-ից հետո կա՞ ծրագիր, որով աշխատում ես։
-Հիմա վիրտուալ իրականության հավելվածի վրա եմ աշխատում։
-Որքա՞ն ժամանակում պատրաստ կլինի դրա հավելվածը։
-Երկու ամսից պատրաստ կլինի ։
-Դպրոցում և ոչ միայն, քեզ արդեն ճանաչում են, հպարտանում քո աշխատանքներով։ Դա քեզ պարտավորեցնո՞ւմ է ավելիին ձգտելու։
-Իհարկե, պետք չի սահմանափակվել նրանով, ինչ կա։ Դրանից ես ավելի եմ ոգևորվում:
–Իսկ քննադատողներ եղե՞լ են ։
-Դեռ ոչ , հուսով եմ չեն լինի։ Եթե նույնիսկ լինեն, պետք չի վախենալ, հիմնականում օգնում են։
-Ծրագրավորման ոլորտում իդեալներ ունե՞ս , ո՞ւմ կուզեիր նմանվել։
-Միանշանակ, Arloopa-ի հիմնադիր տնօրեն Արման Աթոյանը, կուզեի նմանվել իրեն։ Arloopa-ն նույնպես ստեղծում է նմանատիպ հավելվածներ, ոնց ես։
-Իսկ դժվարություններ կամ հիասթափություններ լինո՞ւմ են, և ինչպե՞ս ես հաղթահարում դրանք:
-Դժվարություններ՝ այո, բայց հիասթափություններ՝ ոչ։ հացղթահարում եմ համառությամբ:
-Ո՞րն է քո մոտիվացիայի աղբյուրը, ունե՞ս հաջողության բանաձև ։
– Նորից Արմաթ Աթոյանը՝ որպես մոտիվացիայի աղբյուր, իսկ հաջողության բանաձև դեռ չունեմ. անում եմ այն, ինչ կարծում եմ , որ ճիշտ է։
-Կասե՞ս սիրելի աֆորի՞զմդ։
– Չունեմ, աֆորիզմներ չեմ սիրում։ Միգուցե նրա համար, որ դեռ չեմ գտել այն աֆորիզմը, որը կսիրեմ։
3D մոդելներ և անիմացիաներ
Հարցազրույցը՝ Գայանե Հարոյանի
2-րդ կուրս
