«X Factor 4» նախագծի եզրափակիչ փուլի մասնակից, ԵՊՀ Միջազգային հարաբերություններ ֆակուլտետի ուսանողուհի Մարիամ Ադամյանը մեզ հետ զրույցում պատմել է բնավորության գծերի, տարօրինակ սովորությունների, երաժշտության նախընտրելի ոճի մասին:
-Մասնակցել ես Երգի պետական թատրոնի (ԵՊԹ) «Ամենից ամենա», «Նոր ալիք», «X Factor 4» մրցույթներին, առհասարակ մրցույթներն ի՞նչ են տալիս քեզ:
-Ինքս մրցութային երգչուհի եմ ու շատ եմ սիրում մասնակցել մրցույթների, որովհետև դրանք առաջին հերթին տալիս են շատ մեծ փորձ:
-Ինչո՞ւ «Մարիամ և Էմաննուել» խումբը չշարունակեց իր ընթացքը, հետագայում հնարավո՞ր է ձեր խումբը տեսնենք որևէ ծրագրի կամ համերգի շրջանակներում:
-Մենք ուղղակի երկու անհատ էինք, որ միացել էինք, որպեսզի «X Factor»-ում շարունակենք ելույթ ունենալ, երբեք խումբ չենք եղել, բայց հետագայում սպասվում է համագործակցություն:
-«X Factor 4» ծրագրի մասնակիցներից, բացի Էմաննուելից, կա՞ ինչ-որ մեկը, ում հետ մինչ այժմ շփվում ես:
-Այո, Տյոմը:
-Ինչո՞ւ քեզ չենք տեսնում հեռուստատեսային այլ երաժշտական նախագծերում:
-Երբ սովորում եմ ու երգով եմ զբաղվում, դրանցից մեկն անպայման տուժում է: «X Factor»-ին մասնակցելու ժամանակ դասերս տուժել էին, հիմա ավելի շատ կենտրոնացած եմ դասերիս վրա:
-Ընկերներդ պնդում են, որ շփվող ես, անմիջական, սակայն շատերն առաջին հայացքից մտածում են, որ սառն ես ու գոռոզ, ո՞րն է պատճառը:
-Միշտ ունեմ լուրջ դեմքի արտահայտություն, երևի դա է պատճառը, բայց իսկապես գոռոզ չեմ (ժպտում է-հեղ.):
-Նշիր բնավորությանդ գծերից 3-ը:
-Բարի եմ, բայց դրա մասին շատերը չգիտեն, ընկերասեր եմ ու շուտ եմ բռնկվում, որը փորձում եմ ուղղել:
-Ո՞ր կենդանու հետ կհամեմատես քեզ և ինչու՞:
-Կատվազգիներից ինչ-որ մեկի, երևի ավելի շատ կատվի. երկուսս էլ շատ ենք սիրում հարձակվել:
-Բացի գլուխն ապակյա դռներին խփելուց, ուրիշ ի՞նչ տարօրինակ սովորություններ ունես:
-Որտեղ էլ լինեմ, ինչ հանգամանքներ էլ լինեն, եթե զգամ, որ շրթներկս լավ վիճակում չի, կուղղեմ այն:
-Պատմիր մանկությանդ ամենավառ հուշերից:
-Առաջին դասարանում էի, երբ տատիկս մեքենա էր գնել, մեզ շարադրություն էին հանձնարարել, ու ես գրել էի՝ երբ տխուր եմ լինում, տատիկս ինձ նստեցնում է իր սպիտակ ML-ը(Mercedes) և սլանում դեպի տուն:
-Արմատներով Ապարանից ես, ինչպե՞ս ես վերաբերվում ապարանցիների մասին հումորներին:
-Իրական ապարանցիները հենց իրենք են իրենց մասին հումորներ անում:
-Ընկերներդ նշում են, որ եթե ինչ-որ մեկը քեզ դուր չի գալիս, դա անպայման ցույց ես տալիս: Ի՞նչ հետաքրքիր դեպքեր են եղել:
-Չեմ մտաբերի կոնկրետ դեպք: Էնպես չի, որ մարդու դեմքին ասում եմ, ուղղակի ինքնաբերաբար վերաբերմունքս միշտ դրական չի լինում: Դա հիմնականում պայմանավորված է մարդկանց արարքներով:
-Օրինակ ի՞նչ պետք է անի մարդը, որ առաջին հայացքից քեզ դուր չգա:
-Չեմ սիրում, երբ ծաղրում են ուրիշներին, նման դեպքերում չեմ կարողանում ինձ զսպել ու պաշտպանում եմ դիմացինիս:
-Եթե հնարավորություն ունենաս կյանքիդ որևէ պահ նորից ապրել, ո՞րը կլինի դա:
– «X Factor»-ը, որովհետև դեռ ավելի նշանակալից բան չի եղել իմ կյանքում:
-Ո՞րն է քո սիրած վայրը Երևանում:
-Դժվար հարց է… համալսարանը:
-Նշիր 3 իր, որ միշտ քեզ հետ են:
-Պայուսակ՝ իր բոլոր պարագաներով՝ շրթներկ, հեռախոս…
-Գիտես անգլերեն, ճապոներեն, սովորում ես իտալերեն. ո՞ր ազգի մշակույթն է գրավում ամենից շատ:
-Ասիականը, եթե լիներ կորեերեն, ճապոներենի փոխարեն դա կընտրեի:
-Ո՞ր երկրում կցանկանաս ապրել:
-Ուզում եմ գնալ արտասահման ու մի քանի տարի ապրել, բայց գիտեմ, որ, միևնույն է, հետ եմ գալու Հայաստան:
-Ովքե՞ր են քո ամենասիրելի երգիչն ու երգչուհին:
-Ջասթին Թիմբրլեյքն ու Ալիշա Քիզը, իսկ ամենասիրելի խումբը՝ «Arctic Monkeys»:
-Երաժշտության ո՞ր ոճն է քեզ ավելի հոգեհարազատ:
-Հիմա՝ ռոքը, բայց 2-3 տարի առաջ նախըտրում էի հիփ-հոփը:
-Ի՞նչ երգ է միշտ հնչում ականջակալներումդ:
-Արդեն մի շաբաթ է՝ լսում եմ Ջորջա Սմիթի «Teenage Fantasy»-ն:
-Ինչո՞ւ եկար Միջազգային հարաբերությունների ֆակուլտետ, չէ՞ որ սովորել ես ԵՊԹ-ում, հաջորդ տրամաբանական քայլն այլ տեղ պետք է տաներ:
-Տրամաբանական էր, բայց պետք չէր. Կոնսերվատորիայում իսկական մասնագիտություն չէի ստանալու, ուղղակի գիտելիքներ էի ստանալու երաժշտության մասին: Էստեղ ընդունվեցի, որ ավելի խելացի դառնամ (ժպտում է՝ հեղ.):
-5 տարի անց կտեսնենք Մարիամ Ադամյան երգչուհուն, թե՞ դիվանագետին:
-Հավանաբար` երկուսը մեկում:
Հարցազրույցը՝ Լիլիթ Մկրտչյանի
2-րդ կուրս
