Զրուցակիցս պատանի դաշնակահարուհի, միջազգային մրցույթների դափնեկիր, Կոմիտասի անվան պետական կոնսերվատորիայի ուսանողուհի Մանե Դանիելյանն է:
-Մանե, կուզեի իմանալ, թե ինչո՞ւ երաժշտությունն ընտրեցիք:
-Ես ծնվել եմ արվեստագետների ընտանիքում. հայրս գեղանկարիչ է, մայրս ևս զբաղվել է երաժշտությամբ: Եվ այնպես ստացվեց, որ ես էլ արվեստի այս ճյուղն ընտրեցի: Կարծում եմ, որ յուրաքանչյուր մարդու կյանքում էլ արվեստը շատ կարևոր դեր ունի:
-Ե՞րբ եք սկսել մասնագիտանալ այս ասպարեզում:
-Վեց տարեկանում հաճախել եմ Արարատի Ղազարոս Սարյանի անվան երաժշտական դպրոց: 2 տարի սովորել եմ Երևանի Չայկովսկու,այնուհետև Սպենդիարյանի անվան երաժշտական դպրոցներում: Այժմ ԵՊԿ-ի երկրորդ կուրսի ուսանողուհի եմ:
-Նշեցիք, որ արվեստագետների ընտանիքից եք: Տանը շա՞տ են քննարկում Ձեր մասնագիտական գործունեությունը:
-Այո, դուք ճիշտ նկատեցիք: Նրանց խորհուրդները, մոտեցումները շատ են օգնում: Հայրս սովորեցրել է ինձ լինել համբերատար, շատ աշխատել: Եվ հենց դրա շնորհիվ էլ հասել եմ ներկայիս հաջողություններին:
-Կպատմե՞ք Ձեր գործունեության և հաջողությունների մասին:
-Դեռ 2011թ․ Փարիզում մասնակցել եմ «Պատանի դաշնակահարների» միջազգային մրցույթին և զբաղեցրել երկրորդ հորիզոնականը: Անցյալ տարի մեկնեցի Ավստրիա, որտեղ կրկին ներկայացրի Հայաստանը` հաղթահարելով եզրափակիչ փուլը: Մասնակցել եմ նաև Մալթայում և Վրաստանում անցկացված մրցույթներին:
-Ո՞ր ելույթն է Ձեզ համար ավելի հիշարժան:
-Երևի թե Փարիզում «Ֆլամ» մրցույթի ժամանակ կատարած բոլոր ելույթները, որովհետև դրանք առաջինն էին նման մեծ բեմում: Շատ էի հուզվում: Դա շատ պատասխանատու մրցույթ էր:
-Ի՞նչ դժվարությունների ես հանդիպում միջազգային բեմերում ելույթ ունենալիս:
-Ամենից դժվարն այն է, որ դու քո հարազատ միջավայրում չես: Մարդիկ ևս այլ են: Ունեն իրենց մտածելակերպը և կանոնները, որոնց պետք է ենթարկվես, որովհետև դու նրանց մշակութային դաշտում ես: Չնայած, ըստ իս, երաժշտությունը սահմաններ չի ճանաչում և հասկանալի է բոլորի համար:
-Եթե չընտրեիք այս ուղին, ուրիշ ի՞նչ ճանապարհ կընտրեիք:
-Ես ինձ այլ ոլորտում, այլ գործով զբաղվելիս չեմ պատկերացնում: Երաժշտությունն ինձ համար ամեն ինչ է, այն կյանքիս անբաժան մասնիկն է դարձել:
Հարցազրույցը՝ Էմմա Հովհաննիսյանի
4-րդ կուրս
