ՍՈՑԻԱԼԱԿԱՆ ԲԱՂԱԴՐԻՉԻՆ ՍԿՍԵԼ ԵՆՔ «ՎԵՐԵՎԻՑ» ՆԱՅԵԼ. ԼՈՒՍԻՆԵ ՀԱՐՈՅԱՆ

ՍՈՑԻԱԼԱԿԱՆ ԲԱՂԱԴՐԻՉԻՆ ՍԿՍԵԼ ԵՆՔ «ՎԵՐԵՎԻՑ» ՆԱՅԵԼ. ԼՈՒՍԻՆԵ ՀԱՐՈՅԱՆ

452

Հարցազրույց 2018թ.-ի արտահերթ խորհրդարանական ընտրություններին մասնակցող Ազգային առաջընթաց կուսակցության նախընտրական ցուցակը գլխավորող Լուսինե Հարոյանի հետ:

-Տիկի՛ն Հարոյան, տուրիստական ոլորտից՝ քաղաքականություն, ինչպե՞ս ստացվեց անցումը:

-Ես միշտ եղել եմ պայքարող  ու անարդարությունը չհանդուրժող տեսակ: Միշտ հետևել եմ   քաղաքական գործընթացներին, հնարավորինս բարձրացրել իմ բողոքի ձայնը։ 2014թ․-ից մասնակցել եմ տարբեր քաղաքացիական շարժումների, քանի որ միշտ ցանկացել եմ  Հայաստանը տեսնել ծաղկող երկիր: Իմ ակտիվությունը նկատվեց,  և երբ արդեն  հնարավորություն ստեղծվեց քաղաքական դաշտ մտնելու, «Մենք ենք տերը մեր երկրի» շարժման ակտիվիստներով որոշեցինք մասնակցել ընտրություններին, ստեղծվեց Ազզային առաջընթաց կուսակցությունը։

-Քաղաքական դաշտում առաջին քայլերը անող կինը կարծրատիպերի և խտրականության հանդիպե՞ց:

-Անկեղծ ասած՝ չեմ նկատել: Միգուցե, եթե քաղաքական դաշտում հայտնվեի 5 տարի առաջ  ավելի շատ խտրական վերաբերմունք կզգայի: Քիչ մարդիկ են ուշադրություն դարձրել այն փաստին, որ կին եմ, և այդ առումով բացասական վերաբերմունք ցույց տվել։ Կարծում եմ՝ մարդիկ տարբերում են կեղծը անկեղծից, տեսել են՝ սա իսկապես այն ուժն է, որ ցանկանում է նոր քաղաքական մշակույթ ձևավորել:

-Խորհրդարանական ընտրություններին կուսակցության նախընտրական ցուցակի առաջին համարն էիք և մասնակցեցիք նախընտրական մեծ բանավեճին միակ կինը լինելը չէ՞ր կաշկանդում:

– Լարվածությունը շատ մեծ էր: Ի սկզբանե նախընտրական ցուցակի երկրորդ համարն էի: Քանի որ առաջին համարի թեկնածուն չէր համապատասխանում ընտրական օրենսգրքի պահանջներին, ես դարձա առաջինը: Չէի սպասում, որ կլինեմ առաջին համարը: Պետք էր մասնակցել, առաջ տանել մեր գիծը։ Բանավեճի ժամանակ բոլորը շատ հարգանքով էին: Ամենասկզբում թերհավատություն կար իմ նկատմամբ, բայց արդեն բանավեճի ընթացքում նկատվում էր, որ իրենք ինձ շատ ավելի լուրջ են ընդունում։ Կարծում եմ՝ քո խոսքից, պահվածքից  փոխվում է վերաբերմունքը: Ինձ թվում է՝ իմ առաջին իսկ խոսքերից  հասկացան, որ ես այնտեղ պատահական չէի հայտնվել  և, ինչու ոչ, նաև արժանի հակառակորդ էի:

– Թեպետ խորհրդարանում չհայտնվեիք, բայց վստահ եմ՝ հետևում եք ԱԺ-ում ընթացող գործընթացներին, ինչպե՞ս կգնահատեք կին պատգամավորների գործունեությունը:

– Դեռևս վաղ է որոշակի գնահատականներ հնչեցնելը: Նայելով ներկա խորհրդարանին՝ կարող եմ ասել՝ այնտեղ այն նույն կանայք են ակտիվ, որոնց մենք գիտենք նախկին խորհրդարանից, օրինակ՝ Նաիրա Զոհրաբյան, Մանե Թանդիլյան: Գնահատականը պետք է  երկու տեսանկյունից դիտարկել՝ քանակական և որակական: Քանակական առումով միգուցե  խնդիրը լուծել ենք: Մեզ մոտ օրենսդրական կետ կա կանանց քաղաքական ներկայացվածության վերաբերյալ: Սա նշանակում է, որ Հայաստանը դեռևս հայրիշխանական պետություն է, և կանայք ստիպված են պայքարել իրենց իրավունքների համար: Միայն ԱԺ դահլիճում ներկա լինելը դեռ խնդրի լուծում չէ, քանակ ապահովելու արհեստական միտում եմ տեսնում:

-Եթե հայտնվեիք ԱԺ-ում՝ պատգամավորի կարգավիճակով, կան խնդիրներ, որ առաջնահերթորեն կբարձրաձայնեիք:

-Այս ընթացքում շատ են եղել այնպիսի թեմաներ, որոնք ես կցանակայի բարձրացնել, օրինակ՝ պատգամավորի հետկանչի ինստիտուտի ներդնելը։ Կբարձրաձայնեի միայնակ մայրերի, թոշակառուների խնդիրները: Հիմա չենք տեսնում միտումը, որ խորհրդարանում ներկայացված ուժերը փորձեն նոր օրենքներ բերել խորհրդարան՝ թեթևացնելու այդ խավերի վիճակը։

-Այդ դեպքում ի՞նչ միտում ենք նկատում ԱԺ-ում:

-Միանշանակ կա ԱԺ-ի օրակարգի ձևավորման խնդիր: Պատգամավորները ուշադրությունը կենտրոնացնում են ոչ հրատապ հարցերի վրա՝  մոռանալով գլոբալ խնդիրները: Սոցիալական բաղադրիչին սկսել ենք «վերևից» նայել: Ինչքան էլ  խոսենք վեհ գաղափարներից, հանգելու ենք նույն խնդրին՝  ինչ անենք, որ մարդը լավ ապրի Հայաստանում: Շատ խնդիրների ածանցվում են սոցիալ-տնտեսական  իրավիճակից. անպայման պետք է ունենալ առաջնահերթություններ:

-Վարչապետ Նիկոլ Փաշինյանը բազմիցս նշել է, որ Թավշյա հեղափոխությունը կանայք են իրականացրել. Դու՞ք համակարծիք եք, որքանո՞վ է փոխվել կանանց սոցիալ-քաղաքական կարգավիճակը Հայաստանում:

-Կարծում եմ՝ որոշակի փոփոխություններ կարող ենք արձանագրել: Կնոջ վերաբերյալ նախկինում  ունեցած պատկերացումը՝  կինը միայն խոհանոցի պատերի ներսում  է «բնական» երևում, համաժողովրդական վերելքի պայմաններում փոխվեց: Միանշանակ Հայաստանը դեռ հայրիշխանական հասարակություն է, և կա խտրականություն կին քաղաքական գործիչների հանդեպ: Խնդիրը շատ ավելի խորքային է:

-Մտադրություն կա՞ մասնկացություն ունենալ գալիք խորհրդարանական ընտրություններին:

-Երբ մտնում ես քաղաքական հորձանուտի մեջ, հասկանում ես՝ քեզանից կախված են որոշ բաներ: Ես շարունակելու եմ իմ քաղաքական գործունեությունը. առայժմ պարզ չէ՝ ինչ ֆորմատով: Հաջորդ ընտրություններին մասնկացություն  անպայման ունենալու եմ:

Հարցազրույցը՝ Մարիամ Մկրտչյանի

4-րդ կուրս

Կիսվել