Վերջին ժամանակներս համացանցում լայն տարածում են գտել ֆանարտերը (կուռքերի նկարներ): Ֆանարտեր նկարողները ամենից հայտնի են ինստագրամում. որքան շատ հետևորդ, այնքան հայտնիություն և կուռքերի ուշադրությանն արժանանալու շանսեր:
Ինստագրամում ավելի քան 60.000 հետևորդ ունեցող 22-ամյա Կառոլինան (@karolinames) հայտնի է կորեական փոփ խմբերից մեկի՝ Շայնիի անդամների ֆանարտերով:
-Պատմիր մի փոքր քո մասին։
– Ես ծնվել եմ 1996թ-ին Լիտվայում, այն մի փոքրիկ երկիր է, գտնվում է Հյուսիսային Եվրոպայում՝ Բալթյան տարածաշրջանում: Ես Վիտաուտաս Մագնուսի համալսարանի 4-րդ կուրսի ուսանող եմ: Այս պահին ես աշխատում եմ բակալավրիատի թեզիս վրա և պետք է ավարտեմ այս ամռանը:
-Ինչո՞ւ որոշեցիր զբաղվել հենց արվեստով։
– Ինձ արվեստը միշտ էր հետաքրքրել, բայց միակ մարդիկ, որ խրախուսում էին ինձ գնալ արվեստի դպրոց, իմ տատիկն ու պապիկն էին: Կարծում եմ, նրանք հասկանում էին, որ ես իսկապես սիրում էի այն, և իմ մեջ ինչ-որ պոտենցիալ էին տեսնում: Ես իսկապես շնորհակալ եմ նրանց դրա համար:
-Որքա՞ն ժամանակ է, ինչ նկարում ես։
– Ես նկարում եմ այն ժամանակվանից, երբ կարողացա մատիտ պահել, բայց 11 տարեկանից սկսեցի ավելի լուրջ վերաբերվել նկարչությանը: Ես սկսեցի հաճախել արվեստի դպրոց, երբ 12 տարեկան էի: Այնտեղ սովորեցի 6 տարի:
-Ո՞րն է եղել քո առաջին ֆանարտը։
– Իմ առաջին ֆանարտը նկարել եմ 2014թ-ին: Դա Շայնի խմբի Քին էր, բայց ես այն չեի հրապարակել ինստագրամում, քանի որ այն ձախողված էր: Սակայն մի քանի ամիս անց ես մտավոր վատ վիճակում էի գտնվում և ինձ համար հանգստանալու միջոց էի փնտրում: Այդպիսով, Սուրբ Ծնունդի երեկոյին ես տանը մենակ էի և որոշեցի կրկին անգամ նկարել Քիին: Այն օգնեց ինձ հանգստանալ, և դրանից հետո ես սկսեցի ամեն օր ինչ-որ բան նկարել:
-Որքա՞ն ժամանակ է պահանջվում ֆանարտերի համար։
-Սա այն հարցերից մեկն է, որին ես չեմ կարող հստակ պատասխանել, քանի որ դա կախված է նկարից, իմ մոտիվացիայից և արագությունից: Բայց սովորաբար, եթե այն շատ մանրամասն դետալների չունի՝ տևում է 2 ժամից ոչ պակաս: Իսկ ավելի մանրամասն աշխատանքները կարող են տևել մինչև 6 ժամ կամ 10+ ժամ:
-Երբևէ վաճառե՞լ ես ֆանարտերդ։
– Այո, ես երբեմն վաճառում եմ իմ ֆանարտերը կամ ուղղակի դրանց պատճեններն եմ վաճառում:
-Ի՞նչը կամ ո՞վ է քո ոգեշնչման աղբյուրը։
– Ես հիմնականում նկարում եմ Շայնիի անդամներին, և կարծում եմ որ հենց նրանք են իմ ոգեշնչման աղբյուրը: Ինձ ոգեշնչում են իրենց երգերը, գաղափարները և այլն…։ Բացի այդ, ես ոգեշնչվում եմ նաև իմ շրջապատից և էմոցիաներից:
-Ո՞վ է քո սիրելի արտիստը։
– Եթե խոսքը վերաբերում է արվեստի վարպետներին, ապա Սալվադոր Դալին և Վան Գոգը: Նրանք երկուսն էլ շատ տարբեր են, բայց իրենց արվեստը շատ հետաքրքիր է… Ես երկուսի ոճերն էլ սիրում եմ: Եվ եթե նայենք մերօրյա արվեստագետներին՝ իմ ֆավորիտներից մեկը ինստագրամում @ noma.dic անվամբ հայտնի նկարչուհին է: Եվ կան շատերը, որոնց արվեստով ես հիանում եմ: Իսկ ինչ վերաբերում է K-Pop այդոլներին (այսպես են կոչում կորեացի երգիչներին), ես կարծում եմ, դա բավական ակնհայտ է, որ Շայնիին և Թեյոնը իմ սիրելի արտիստներն են:
-Ի՞նչ կարծիքի ես այլ ֆանարտեր նկարողների մասին: Դու հավանու՞մ ես նրանց աշխատանքները։
– Այո, իհարկե…։ Ես ինստագրամում հետևում եմ նրանց: Միշտ հետաքրքիր է տեսնել տարբեր ոճերն ու մոտեցումները:
-Կարդու՞մ ես ինստագրամյան մեկնաբանությունները: Ո՞րն է եղել ամենաոգեշնչող մեկնաբանությունը, որ կարդացել ես։
– Իհարկե, ուղղակի չեմ կարող որևէ մեկնաբանություն նշել: Ինձ ոգևորում է, երբ մարդիկ ասում են, որ իմ արվեստում տեսնում են զգացմունքներ:
-Այդոլները երբևէ տեսե՞լ են քո ֆանարտերը։
– Ես կարողացել եմ իմ ֆանարտերից տալ Շայնի խմբի Քիին և Ջոնհյոնին: Իսկ ուրիշների մասին՝ իսկապես չգիտեմ…։
-Ինչպիսի՞ նպատակներ ունես։
– Քանի որ կյանքը գնալով ավելի է բարդանում և ես զգում եմ թե դա ինչպես է ճնշում իմ սոցիալական հաշիվները, ես պարզապես ուզում եմ նստել և վայելել այն, ինչ ես նկարում եմ, առանց որևէ բանի համար անհանգստանալու: Բացի այդ ես ցանկանում եմ ավարտել այն նախագիծը, որը սկսել եմ մեկ այլ ֆանարտիստի հետ և տեսնել, թե ինչեր կգան այդտեղից…։
Հարցազրույցը՝ Գոհար Պետրոսյանի
2-րդ կուրս
