ՀՀ ԿԳՄՍ նախարարը Ժաննա Անդրեասյանը 2024-2025 թթ. ուսումնական տարին հայտարարել էր որպես «Մշակութային կրթության տարի»։
Սեպտեմբերի 14-ին «Դպրոցական բաժանորդային համակարգ» ծրագրի Էքսպո-արշավի շրջանակում Զվարթնոցում էին մեկտեղվել Արմավիրի մարզի մշակութային հաստատությունները։
Միջոցառման պատասխանատուն նշեց, որ կրթամշակութային էքսպո-արշավը դարձել է հիանալի հնարավորություն աշակերտների և ուսուցիչների համար՝ ծանոթանալու մարզի մշակութային հաստատությունների գործունեությանն ու առաջարկվող ծառայություններին։
«Արմավիրի մարզի դպրոցականները մասնակցել են Մեծամոր պատմահնագիտական արգելոց-թանգարանի նախաձեռնած «Շոշափելի և վիրտուալ Մեծամոր» ծրագրին, որի ընթացքում պատրաստել են մետաղից նետասլաքներ և ապարանջաններ»։
Պատասխանատուի խոսքով, միջոցառման արդյունքում մի շարք դպրոցներ ցանկություն են հայտնել այցելել մարզի թանգարաններ՝ մասնակցելու կրթական ծրագրերին, ինչը վկայումէ ծրագրի հաջողության մասին:
Էքսպոյի ընթացքում Երաժշտական և պարային համարներով հանդես եկան Վաղարշապատի Խաչատուր Աբովյանի անվան 4-րդ դպրոցի աշակերտները, «Կոմիտասի անվան մշակույթի պալատ» ՀՈԱԿ-ի «Էջմիածնի պարարվեստի կենտրոնի» և «Արմավիր քաղաքի արվեստի դպրոց» ՀՈԱԿ-ի սաները։
Միջոցառմանը մասնակից Անին նշեց, որ իրենք երկար էին պատրաստվում այս տոնին և մեծ ոգևորությամբ են եկել այստեղ. «Պարային ու երաժշտական համարներին երկար ենք պատրաստվել, և ես շատ ուրախ եմ, որ այստեղ ենք: Ամեն ինչ շատ հետաքրքիր է»:
Անին հատկապես տպավորված էր «Զվարթնոցը վերականգնելու» փորձառությամբ. «Ամենահետաքրքիրը այն էր, որ կարողացանք մեր ձեռքերով ստեղծագործել՝ Զվարթնոցի քանդված հատվածները վերականգնելով: Ինձ համար յուրահատուկ փորձ էր, ես ու ընկերներս հաճույքով ենք մասնակցել»։
Էքսպոն ոչ միայն հնարավորություն տվեց աշակերտներին ցուցադրել իրենց արվեստը, այլև նպաստեց նրանց հետաքրքրությունների ընդլայնմանը, մշակութային և կրթական զարգացմանը:
Լուսինե Նավասարդյան
2-րդ կուրս
