Հայ-ադրբեջանական սահմանի հյուսիս-արևելյան հատվածում տեղի ունեցած շուրջ 6-օրյա մարտական գործողությունների ընթացքում ՀՀ ԶՈՒ ՀՕՊ-ը խոցել է 14 ԱԹՍ, որից 10-ը` հարվածային, 4-ը հետախուզական կորուստներ են: Վիդեո`խոցված անօդչուներից:
Այսօր Արմենակ Խանփերյանցի անվան ռազմական համալսարանում` Հայկական զինված ուժերի հակաօդային պաշտպանության ստորաբաժանումների կողմից չեզոքացված, Ադրբեջանի կողմից կիրառված տարատեսակ խոցված ԱԹՍ-ների մասերի հատուկ ցուցադրություն էր կզամակերպել ՊՆ-ը: Ընդ որում, կային սարքեր, որոնք ունեին ամբողջական տեսք:
Ավիացիոն համալսարանի պետ, գեներալ-մայոր Բալայանի խոսքով, ադրբեջանական կողմը վատ չի կառավարել ԱԹՍ-ները, այլ հայկական կողմն է կարողացել համարժեք պատասխան տալ. «Իրենք խոցվել են մեր ՀՕՊ զորքերի հմտության շնորհիվ: Եվ, ի վերջո, հարցը նրանում չէ, թե որքան գումար կծախսվի, գուցե ծախսվի 100.000 դրամ, բայց շատ մեծ չափերի հասնող վնասներ պատճառես հակառակորդին, և հակառակը»:
Ընդհանուր առմամբ, նշված ժամանակահատվածում ոչնչացվել են հակառակորդի 14 անօդաչու թռչող սարք, ընդ որում, ռազմավարական, հետախուզական և հարվածային նշանակություն ունեցող. «Նշված միջոցները խոցվել են ՀՀ ԶՈՒ առկա հակաօդային պաշտպանության միջոցներով` սկսած զենիթային հրետանու միջոցներից, վերջացրած ժամանակակից ՀՕՊ միջոցներով, կախված այն հանգամանքից, թե հակառակորդի սարքը ի՞նչ խորությամբ, և ի՞նչ միջոցի հասանելիության տիրույթում է գտնվել»,- ասաց ավիացիոն ՀՕՊ զորքերի շտաբի պետ գնդապետ Մովսիսյանը:
Գնդապետ Մովսիսյանի խոսքով` հայկական ոչ մի անօդաչու թռչող սարք չի խոցվել հակառակորդի կողմից. «Մեր սարքավորումները աշխատել են թե՛ ցերեկային, թե՛ գիշերային պայմաններում, և իրենց առջև դրված բոլոր խնդիրները կատարել են, իսկ մենք նյութական կորուստներ չենք ունեցել»:
Հայացք գցելով Ապրիլյան պատերազմում` հայկական զինված ուժերի գործողություններին, և, համեմատական տանելով հուլիսյան դեպքերի հետ, գնդապետը նշեց, որ այդ ժամանակ խնդիր ունեինք մեր պրակտիկայում. «Անկախ Հայաստանի` Զինված ուժերի պատմության մեջ, առաջին անգամ էին նման միջոցներ կիրառում և հաշվարկները լավ արված չէին: Դրանից հետո մենք կատարեցինք համապատասխան հետևություններ` ուղղեցինք մեր զորքերի պատրաստությունը, իրականացրեցինք մեր համակարգերի որոշակի արդիականացում, նաև նոր միջոցների ձեռքբերում: Եթե սարքը մեր միջոցի տեսանելիության հայտնաբերման գոտում է, ապա նրա խոցումը այլևս խնդիր չէ մեզ համար»:
Հիշեցնենք, որ հուլիսյան գործողությունների արդյունքում հայկական կողմը առաջին անգամ խոցել է իսրայելական արտադրության Հերմես 900 անօդաչու թռչող սարք:
Մերի Մանուկյան
