Վիկտոր Համբարձումյանի անվան միջազգային գիտական մրցանակը 2010թ․-ից ի վեր՝ յուրաքանչյուր երկու տարին մեկ անգամ շնորհվում է աստղագիտության, աստղաֆիզիկայի և հարակից գիտությունների ոլորտներում նշանակալի գիտական աշխատանքների համար։ Մրցանակի համար շնորհվում է դափնեկրի դիպլոմ, պատվո նշան, $ 200 հազ․ դրամական պարգեւ և $ 100 հազ․ դրամական միջոցներ, որոնք մրցանակը ստանալու հաջորդող երկու տարիների ընթացքում օգտագործվում են Հայաստանում աստղաֆիզիկայի, ինչպես նաև ֆիզիկայի և մաթեմատիկայի բնագավառների զարգացման համար։
Այս տարի այն շնորհվել է պրոֆեսորներ Ալեքսանդր Սալային, Իզաբել Բարաֆին և Ադամ Բարոուզին։
Ալեքսանդր Սալայը (Ջոնս Հոփքինսի համալսարան, Բալթիմոր, ԱՄՆ) Բլումբերգի լավագույն պրոֆեսորներից է։ Նա նաև համակարգչային գիտությունների ամբիոնի պրոֆեսոր է և Տվյալների ինտենսիվ մշակման ինստիտուսի տնօրեն։ Սալայը տիեզերաբան է, ով զբաղվում է գալակտիկաների տարածական բաշխման և դրանց ձևավորման վիճակագրական ցուցանիշների հարցերով։ Նա Հունգարիայի Գիտությունների ակադեմիայի և Ամերիկյան արվեստի և գիտությունների ակադեմիայի թղթակից անդամ է։ 2004 թվականին պրոֆեսորը ստացել է Ալեքսանդր ֆոն Հումբոլդտի մրցանակը ֆիզիկական գիտությունների բնագավառում, իսկ 2007 թվականին ՝ Microsoft Jim Gray Award մրցանակը։ 2008 թվականին դարձել է Բուդապեշտի Էոտվոս համալսարանի պատվավոր դոկտոր։ Վիկտոր Համբարձումյանի անվան միջազգային գիտական մրցանակին առաջադրվել է «Տիեզերքում մութ նյութի՝ որպես չեզոք, թույլ փոխազդող մասնիկ լինելը ցուցադրող իր առաջնային աշխատանքի եւ տվյալների վրա հիմնված վիճակագրական տիեզերաբանության մեջ ներդրումների համար»։
Իզաբել Բարաֆը (Էքսետերի համալսարան, ՄԹ եւ Լիոնի CRAL/ENS, CNRS, Ֆրանսիա) Էքսետերի համալսարանի Աստղաֆիզիկա բաժնի ամբիոնի վարիչ է ։ Նա ընդունվել է Էքսետերի համալսարան 2010 թվականին։ Մինչ այդ համալսարանում աշխատելը նա եղել է Լիոնի հետազոտական կենտրոնի աստղաֆիզիկայի պրոֆեսոր (CRAL), դոցենտ, Գոթինգենի համալսարանի դոկտոր, Մաքս-Պլանկի համալսարանի աստրոֆիզիկայի բաժնի պրոֆեսոր և այլն։ Բարաֆը ստացել է բազմաթիվ մրցանակներ, որոնց թվում են 2010 թվականի թագավորական Wolfson Research Merit Award մրցանակը, Գիտական հետազոտությունների ազգային կենտրոնի բրոնզե մեդալը(Ֆրանսիա) 1999 թ., Եվրոպական առաջատար հետազոտական խորհրդի (ERC) երկու դրամաշնորհները 2012 և 2018 թվականներին և այլ մրցանակներ։ Վիկտոր Համբարձումյանի անվան միջազգային գիտական մրցանակին առաջադրվել է «Ցածր զանգվածով աստղերի, գորշ թզուկների եւ արտարեգակնային մոլորակների բնագավառում իր հիմնարար ներդրումների եւ աստղասեյսմաբանության եւ կոմպակտ կրկնակիների ոլորտում նորարարական գաղափարների համար»։
Ադամ Բարոուզը (Աստղաֆիզիկական գիտությունների բաժին, Փրինսթոնի համալսարան, ԱՄՆ) Փրինսթոնի համալսարանում աստղաֆիզիկական գիտությունների հայտնի պրոֆեսոր է։ Բարոուզի գիտական հետազոտության հիմնական ուղղություններն են շագանակագույն թզուկների տեսությունը, մոլորակների մթնոլորտը, հաշվողական աստղաֆիզիկան, միջուկային աստղաֆիզիկան և այլն։ Վերջին 30 տարիների ընթացքում նա գրել է մի շարք հիմնարար և ազդեցիկ աշխատանքներ, ակնարկներ այդ թեմաների շուրջ: Բարոուզը համագործակցել է ավելի քան 150 համահեղինակների, ավելի քան 300 թերթերի հետ։ Նախկինում նա եղել է Ֆիզիկայի և աստղագիտության ազգային հետազոտական խորհրդի նախագահ, աշխատել է Աստղագիտության և աստղաֆիզիկայի կոմիտեում և այլն։ ՆԱՍԱ-ի 2003 թ Origins ճանապարհային քարտեզի հեղինակն է, Princeton Planets and Life Certificate Program ծրագրի տնօրենն է։ Նաև ընդգրկված է Ասպենի ֆիզիկայի կենտրոնի հոգաբարձուների խորհրդի կազմում: Վիկտոր Համբարձումյանի անվան միջազգային գիտական մրցանակին առաջադրվել է «Գորշ թզուկների եւ արտարեգակնային մոլորակների տեսություններում իր բեղմնավոր եւ առաջնային ներդրումների եւ գորշ թզուկների եւ արտարեգակնային մոլորակների հետազոտությունների առաջնագծում գիտնականների սերունդ աճեցնելու գործում նրա առաջատար դերի համար»։
Մրցանակի հանձնման պաշտոնական արարողությունը տեղի կունենա 2020թ․ սեպտեմբերի 18-ին։
