Ամիսներ առաջ մոսկովյան LOOK FILM ընկերության նախաձեռնությամբ մեկնարկել է նոր ֆիլմաշարի նախագիծ: Այն միտված է տարբեր մշակույթների առակները վերածել կարճամետրաժ ֆիլմերի, և մեր իրականության կոնտեքստում ներկայացնել նրանց հասարակ և պարզ բարոյախրատական արտացոլումը: Նախագծի հիմնական նպատակը բացահայտելն է նոր անուններ և օժանդակել երիտասարդ հեղինակներին:
Մրցույթում ընտրված 7 պատմություններից մեկի հեղինակը հայ երիտասարդ ռեժիսոր Ասպետ Շերմազանյանն է: Նա ընտրել է դասական քրիստոնեական թեմա՝ «Անառակ որդու վերադարձը»: Ընտրությունը պայմանավորված է մի հանգամանքով. նա իրական պատմություն ունի, որը տեղի է ունեցել Լոռիում 90-ականներին: Մի մարդ հեռանում է իր գյուղից և 10 տարի ոչ ոք լուր չի ստանում նրանից: Ոմանք կարծում էին՝ նա արտերկրում է, շատերը հավատացնում էին անգամ, որ նա ինքնասպան է եղել և այսպես շարունակ: Տարիներ անց այդ մարդը հանկարծ վերադառնում է. կյանքի փորձություններին չդիմակայելուց հետո նա նոր է գիտակցում հոր և հայրենի օջախի ուժն ու կարևորությունը:
«Իմ ֆիլմի հերոսը կայացած ու ամուր է վերադարձել, բայց գլուխը կախ ու ամաչելով` իր լեռներից ու սարերից, քանզի իր ձեռք բերածն էլ փոշի է դառնում այն արժեքների կողքին, որոնցից նա հեռացել էր»,-նշեց Ասպետ Շերմազանյանը:
Փետրվարի 28-ին «Մոսկվա» կինոթատրոնում կայացավ երիտասարդ ռեժիսորի երեք կարճամետրաժ ֆիլմերի ցուցադրությունը, որոնցից մեկը հենց «Անառակ որդու վերադարձն» էր:
Առաջին երկուսը՝ «Ամնեզիա»-ն (դերերում` Միխայիլ Գորեվոյ, Կարեն Մարտիրոսյան, Անտոն Ստրելյաեվ, Վիկտոր Սալամյանով) և «Մի գողացիր»-ը (դերերում` Միխայիլ Բոգդասարով, Դմիտրի Օդինցով,Լյուբով Շեվչենկո), մոսկովյան իրականության մասին պատմող կրիմինալ կոմեդիաներ են, որտեղ հանդիսատեսը ականատես է լինում նյութապաշտ մարդու աստիճանաբար կործանմանը:
«Ֆիլմերի պատրաստման աշխատանքը տևեց մոտ մեկ տարի և կես: Երեք ֆիլմի մասին էլ կարելի է երկար խոսել: Ֆիլմերից 2-ը Աստվածաշնչի առակների վրա հիմնված ֆիլմեր են: Սակայն երեքից և՛ ինձ, և՛ ռեժիսորի համար ամենահոգեհարազատը «Աղ ու հաց» կամ «Անառակ որդու վերադարձը» ֆիլմն է: Քրիստոնյաների, հայերի, ողջ մարդկության համար շատ մեծ ասելիք կա ֆիլմում: Շատ բարի և դրական լինելով հանդերձ՝ այն հայկական է և ուսուցանող»,- մեզ հետ զրույցում նշեց ֆիլմի պրոդյուսերը:
Երրորդ ֆիլմը ցուցադրելուց առաջ Ասպետ Շերմազանյանը, ով ֆիլմի ռեժիսորն ու սցենարի հեղինակն է, հայտարարեց. «Հիմա կտրվենք մոսկովյան իրականությունից և վերադառնանք Հայաստան»:
Լինելով արմատներով լոռեցի՝ Ասպետ Շերմազանյանը նշում է, որ դեռ տարիներ առաջ երազում էր ֆիլմ նկարահանել Լոռիում, որի բնաշխարհը կինեմատոգրաֆի տեսանկյունից էլ անգնահատելի է: Եվ այսօր, երբ ֆիլմն արդեն պատրաստ է, այն առաջին հերթին նվիրում է իր հորը և եղբորը, որը այժմ ծառայում է Մարտակերտում: Նա պարբերաբար խորհրդակցել է եղբոր հետ, ով նկարահանումների ամբողջ ընթացքում մշտապես օգնել է կրեատիվ մտահղացումներով:
«Անառակ որդու վերադարձը» ֆիլմը նկարահանվել է Հայաստանում: Երկու եղբայրների կերպարները մարմնավորել են Արսեն և Խորեն Լևոնյանները: Ֆիլմի գլխավոր հերոսը մոտ տասը տարի չի եղել հայրնեի գյուղում: Այդ դերում հանդես է գալիս Արսեն Լևոնյանը:
«Ուրախ եմ, որ հնարավորություն ստացա եղբորս հետ հենց երկու հարազատ եղբոր դերերում հանդես գալ: Նա ինձ շատ օգնեց, որի համար շատ շնորհակալ եմ: Կերպարները շատ ենք մշակել: Թեման նույնպես շատ արդիական է»,-նշեց Արսեն Լևոնյանը:
Ֆիլմում հոր կերպարը կերտել է մասնագիտությամբ նկարիչ Սամվել Սևադա Գրիգորյանը:
«Ես համաձայնեցի նկարահանվել ֆիլմում, որովհետև թեման ինձ հուզեց, և հետո, երբ երիտասարդները գործ են անում, նրանց պետք է օգնել և համագործակցել: Իսկ այսօր կարող եմ շնորհավորել՝ հայկական կինոյում արդեն շարժ կա»,- նշեց Սամվել Սևադան:
Սա երիտասարդ մասնագետների առաջին համագործակցությունն է: Հետագայում ծրագրում են Տավուշի և Լոռվա մարզերի բարբառով՝ «Դըբա լավը» ֆիլմի նկարահանումները: Ֆիլմի աշխատանքները կսկսվեն առաջիկա մեկ շաբաթվա ընթացքում, իսկ նկարահանումները կընթանան նաև Թբիլիսիում և Մոսկվայում: Դա լինելու է նրանց առաջին լիամետրաժ ֆիլմը:
«Մեր թիմը փնտրում է մեզ պես խենթ, էնտուզիազմով հարուստ երիտասարդների, ովքեր պատրաստ են համագործակցել: Ֆիլմը երկու լոռեցի տղաների մասին է, որոնք վրեժ լուծելու կամ պատիվը վերականգնելու համար Լոռուց հասնում են Մոսկվա: Այստեղ գյուղացու այն տեսակն է, որն արհամարհված է»,- ասաց Ասպետ Շերմազանյանը:
Միլենա Մկրտչյան
1-ին կուրս
