Այսօր կայացած ասուլիսի ժամանակ ՀՀ ՊՆ ներկայացուցիչ Արծրուն Հովհաննիսյանն ասաց, որ ինչպես այսօր օրվա ընթացքում հայտնել է ՊՆ-ն, Ադրբեջանի ԶՈւ -երը, խախտելով հումաբիտար հրադադարի պայմանավորվածությունը, և՛ հարավային, և՛ հյուսիսային ուղղություններով ձեռնարկել է հարձակողական գործողություններ, մասնավորապես, գրոհ են իրականացրել զրահատեխնիկայի և հրթիռային միջոցների կրակի ուղեկցությամբ և հյուսիսային ուղղությամբ կրելով 2 զրահատեխնիկայի կորուստ՝ հետ են շպրտվել։ Հարավային ուղղությամբ ևս եղել են որոշակի առաջխաղացումներ, որոնք կասեցվել են։
«Օրվա ընթացքում խոցվել է նաև 1 ԱԹՍ։ Որոշ տեղերում, իհարկե, պահպանվել են համեմատաբար հանգիստ վիճակ, մեծ տրամաչափի զինատեսակներից ինտենսիվ կրակ չի վարվել, սակայն հրադադարի ռեժիմի լիարժեք պահպանում չի իրականացվել, որը թույլ կտար դիակների և ինչպես պայմանավորվել էինք, գերիների փոխանակում»,-նշեց Արծրուն Հովհաննիսյանը։
Նա նաև ասաց, որ թուրքական ռազմաօդային ուժերը շարունակում են ղեկավարել Ադրբեջանի ռազմաօդային ուժերի գործողությունները։ «Մասնավորապես, օդային ղեկավարման կետերի կառավարմամբ թուրքական F-16 վեց միավոր կործանիչների պատսպարմամբ և ուղեկցմամբ՝ թուրքական ու իսրայելական արտադրության մարտական ԱԹՍ-ները հարվածներ են հասցնում Արցախի ենթակառուցվածքներին, կապուղիներին եւ ԶՈՒ-երին։ Այդ գործողությունները կասեցնում են ՊԲ ՀՕՊ միջոցները»,-ասաց Հովհաննիսյանը։
Նա նաև նշեց, որ այսօր ադրբեջանական կողմից կեղծ հայտարարությունները ևս շարունակվել են, թե հայկական ԶՈՒ-երը ևս խախտում են հրադադարը եւ կիրառում են մեծ տրամաչափի զինատեսակներ։ Նրա խոսքով՝ Ադրբեջանը նորից փորձում է իր հետագա գործողությունների համար սադրանքի հիմքեր ստեղծել։
Արրուն Հովհաննիսյանն ասաց, որ ՊՆ-ն հստակ հայտարարել է, որ մինչև հրադադարի լիարժեք պահպանում չլինի, որպեսզի Կարմիր խաչը կարողանա աշխատել, դիակները լիովին դուրս բերվել չեն կարող։
Իսկ Ստեփանակերտի մասին ՊՆ ներկայացուցիչն ասաց. «Ստեփանակերտը երեկ գիշերը հրթիռակոծվել է նույն տրամաչափի կրակային միջոցներով՝ հեռահար համազարկային կայանքներով, ինչպես հրադադարից առաջ»։
