Այսօր զրուցել ենք AgaTrend Handmade Accessories բրենդի հիմնադիր Աղավնի Տեր-Հովհաննիսյանի հետ։ Խոսել ենք նոր շունչ և թարմություն ստացող զարդերի պտրաստման հետաքրքիր և նուրբ դետալների մասին, որոնք կհետաքրքրեն այսօրվա սպառողին։
-Ե՞րբ և ինչպե՞ս եք սկսել զբաղվել պայուսակների և զարդերի պատրաստմամաբ։
-AgaTrend-ի պատմությունը ծնունդ առավ 2018 թվականին նվիրական գաղափարից` աճող և գործող բիզնես, որը սնվում և մոտիվացվում է ամենօրյա ստեղծագործ աշխատանքով։ Իր գործունեության բազմամյա տարիների ընթացքում AgaTrend-ը կյանքի է կոչել մի շարք ստեղծարար մտքեր և գեղեցիկ էսքիզներ` շեշտադրելով այն կրողի ինքնատիպությունն ու առանձնահատկությունը։
-Իսկ ինչու՞ AgaTrend։
–AgaTrend բացվածքը ինքնին կոչ է, որպեսզի սպառողն ասի «Այո՛» նոր թրենդերին, ինչպես նաև անվանումը բովանդակում է իմ՝ որպես դիզայների, անվան սկզբնամասը։
-Ձեռագործ աշխատանքների վրա շատ ժամանակ և էներգիա է ծախսվում, հետևաբար ինչպե՞ս եք զարդերի և պայուսակների արժեքը սահմանում։
-Ցանկացած աշխատանք ժամանակ և սեր է ենթադրում, իսկ դրանք մեր կյանքի ամենակարևոր ռեսուրսներն են։ Կարևոր է նաև մտքի արծարծումը, քանի որ միտքը ինքնին զարդի գաղափարն է։ Այս ամբողջի հանրագումարն էլ կազմավորում է աքսեսուարի արժեքը։ Իհարկե հաշվի ենք առնում նաև սպառողի միջինացված վճարունակությունը և մշտապես կատարում ենք որոշակի գնային փոխզիջումներ` մեր յուրաքանչյուր հաճախորդին պարգևելով սեր և ուրախություն։
–Ըստ Ձեզ՝ որքանո՞վ են հարմար միջին վիճակագրական սպառողին Ձեր սահմանած գները։
-Աքսեսուարն առաջին սպառման առարկա չէ, և հիմնականում հաճախորդներն իրենց թույլ են տալիս նման գնում առիթից առիթ։ Մենք պարբերաբար մշտադիտարկում ենք շուկայի գնային սանդղակները և սահմանում մրցունակ գին` հարմար հաճախորդի գրպանին և էսթետիկ ճաշակին։
–Ձեր անհատականությունը ինչպե՞ս եք դրսևորում Ձեր աշխատանքներում։
-Ասում են, որ մարդ նմանվում է այն ամենին, ինչ ստեղծում է։ Ուստի և աքսեսուարները ևս ունեն ոգի և տրամադրություն։ Լինելով մինիմալիզմը գնահատող անհատ` ուրույն և նրբագեղ մոտեցում ունեմ աքսեսուարների ստեղծման հարցում։ Սրանով հանդերձ յուրաքանչյուր աշխատանքում ընդգծում եմ այն կրողի անհատականությունն ու գունային նախապատվությունը։ Արդյունքում ստացվում է զարդ ստեղծողի և զարդ կրողի յուրահատուկ սիմֆոնիա։
-Շուկայում նմանատիպ աշխատանքների շատ ենք հանդիպում։ Ձեր աշխատանքները ինչո՞վ եմ տարբերվում մյուսներից։
-AgaTrend-ի ստեղծած աշխատանքների պորտֆոլիոն հարուստ է ինչպես մեծաքանակ, այնպես էլ անհատական աշխատանքներով։ Պատվերի ընդունման ժամանակ պատվիրատուի հետ մանրամասն քննարկվում է էսքիզի նախնական տեսքը, գունային ընտրությունն ու քարերի դասավորվածությունը։ Շուկայի աքսեսուարների ներկայացուցիչներից տարբերվում ենք մեր տեսլականով` զարդ կրողի անհատականության ընդգծումն ու ճիշտ էներգիայի փոխանցումը։ Չէ որ յուրաքանչյուր զարդ էներգիա է ստեղծում և հաղորդում այն կրողին։
-Ինչպիսի՞նն է այն տրամադրությունը, որը Դուք հաղորդում եք սպառողին Ձեր աշխատանքների միջոցով։
-Հաճելի և գոհունակ։
-Ի՞նչ հատկանիշներ է պետք ձեռագործ աշխատանքներ պատրաստելիս։
–Մեծ համբերատարություն, գեղեցիկն արարելու պատրաստակամություն և նրբագեղ ճաշակ։
-Օնլայն հարթակում հանդես գալը ի՞նչ տվեց Ձեզ, բացի սեփական աշխատանքները վաճառելուց։
-Օնլայն հարթակը այսօրվա բիզնեսին ընձեռում է մի շարք հնարավորություններ։ Այսօրվա նորագույն տեխնոլոգիաների դարաշրջանում օնլայն տիրույթում խանութ ունենալը հրամայական է։ Այն բիզնեսին տալիս է ծավալվելու նոր հորիզոններ, նոր հաճախորդներ ներգրավելու հնարավորություն և վաճառքները խթանելու առաջընթաց։ Եվ իհարկե կարևոր է նշել, որ յուրաքանչյուր բրենդ կարող է անցնել երկար և հեռու ճանապարհ, եթե վայելում է իր պատվիրատուի սերն ու գոհունակությունը։ Ես շատ շնորհակալ եմ մեր բոլոր պատվիրատուներին իրենց կարևոր առիթների՝ նվերի և զարդերի ընտրությունը մեզ վստահելու համար։
-Այս աշխատանքի հետ կապված ի՞նչ պլաններ ունեք հետագայում։
-Պլանները բազմավեկտոր և բազմաժանր են։ Առաջիկայում նախատեսվում են նոր ուղղությամբ և նոր ոճայնությամբ աքսեսուարների թողարկում, որոնք կբովանդակեն գալիք տարվա նորաձևության թրենդերը։ Ինչպես յուրաքանչյուր բիզնեսին, այնպես էլ իմ գործունեությանը մշտապես փոխանցվում է նոր շունչ և թարմություն։
Օֆելյա Հովհաննիսյան
4-րդ կուրս
