Էսթեր Զաքարյանը արդեն 5 տարի է ամուսնու՝ Գարիկ Փայտյանի հետ բնակվում է Տավուշի մարզի Նորաշեն գյուղում։ Երևանից մարզ տեղափոխվելու հիմնական նպատակը նրանց համար եղել է տարածաշրջանի տուրիստական մեծ պոտենցիալի բացահայտումն ու զարգացումը։
Սկզբնական շրջանում նրանք զբոսաշրջային տուրեր էին կազմակերպում դեպի Բերդ համայք՝ փորձելով այն ճանաչելի դարձնել շատերի համար։ Հետագայում արդեն նրանք հիմնցին իրենց հյուրատունը և գաստրոբակը։
«Սկզբում սկսել ենք արշավներ կազմակերպելով, հետո ամուսնուս պապական տունը դարձրել ենք հյուրատուն և հյուրեր ենք ընդունել՝ ինչպես Երևանից, այնպես էլ տարբեր երկրներից։ Երբ հասկացանք, որ սնվելու ամենամոտ վայրերը գտնվում են Բերդ քաղաքում, և մոտակա գյուղերում էլ չկային նմանօրինակ ենթակառուցվածքներ, որոշեցինք հենց մեր տան բակում գաստրոբակ հիմնել»,-իրենց անցած ճանապարհով կիսվում է մեզ հետ Էսթերը։
Գաստրոբակում հյուրերին առաջարկվում է տավուշյան ավանդական ուտեստներ, որոնց պատրաստմանը հյուրերը կարող են անձամբ ականատես լինել և մասնակցել։
Քանի որ գաստրոբակի աշխատանքը սեզոնային բնույթ ունի, նրանք զբաղվում են նաև հացի արտադրությամբ։ Թխում են բարձր կարգի ու ամբողջահատիկ ալյուրով հացեր, որոնք նաև իրացնում են տարածաշրջանի դպրոցներում և խանութներում։
Էսթերը մասնագիտությամբ միջազգայնագետ է, ու թեև իր մասնագիտական աշխատանքով չի զբաղվում, բայց կատակով նշում է, որ ինքը գործուղվել է Նորաշեն՝ որպես Նորաշենի արտակարգ և լիազոր դեսպան։
Էսթերը իրենց բիզնեսի հաջողությունը, որը նաև նպաստում է տարածաշրջանի զարգացմանը, կապում է իրենց պատմության հետ․
«Մեր պատմությունը, այն թե ինչպես են քսան տարուց ավել Երևանում բնակվող երիտասարդները որոշել տեղափոխվել գյուղ և այստեղ ապրել, դարձել է մեր այցեքարտը։ Հյուրերից շատերը, կարծում եմ, եկել են մեզ հետ անձամբ ծանոթանալու և մեր պատմությունը մեզնից լսելու նպատակով»։
Երևանից Նորաշեն հեռավորությունը 220 կմ է։ Թեև Էսթերի խոսքով սա բարդացնում է իրենց աշխատանքը, բայց նրանք փորձում են ամեն ինչ անել, որ մարդիկ անցնեն այդքան ճանապարհ իրենց հանգիստը Բերդի շրջանում կազմակերպելու համար։
«Մեզ համար խնդիր էր նաև, որ տարածաշրջանը հայտնի չէր իր տեսարժան վայրերով։ Գործունեության նախնական փուլում դրա վրա շատ ենք աշխաել։ Երբ տուրիստը գալիս էր մեզ մոտ, մենք պետք է մտածեինք՝ ինչպես զբաղեցնել նրան ողջ օրը»։
Գյուղական կյանքի դրական ու բացասական կողմերը Էսթերը ներկայացնում է նաև իր ինստագրամյան բլոգի միջոցով, որտեղ պատմում է իր հագեցած առօրյաի մասին՝ փորձելով կոտրել «գյուղում զբաղմունք չկա» կարծրատիպը։
Վստահաբար միայն այս կարծրատիպը չէ, որ կոտրում է նա։ Էսթերի օրինակով կարելի է նշել, որ քաղաքացի և գյուղացի տարանջատումները կեղծ են, և որ յուրաքանչյուրս կարող ենք զարգացնել Հայաստանի ամեն անկյուն, եթե շատ սիրենք մեր երկիրը։
Սյուզաննա Օհանյան
2-րդ կուրս
