Շուրջ մեկդարյա պատմություն ունեցող Հայաստանի պետական ֆիլհարմոնիայի շենքը՝ կարմիր ու սև տուֆից կառուցված հսկան, շունչ է առել 19-րդ դարի սկզբին և իր հարկի տակ «ապրեցրել» Հայաստանի առաջին հանրապետության Ազգային ժողովը, Երևանի մշակույթի տունը, Հանրային գրադարանը։ Ֆիլհարմոնիկը համարվում է մշակութային կենտրոն, որի դռները միշտ բաց են հետաքրքիր գաղափարներ ունեցող երիտասարդների առջև։ Հենց այդ բաց դռներից այն կողմ էլ հավաքվել են արվեստով ապրող մի խումբ երիտասարդներ և ստեղծել «Կապ» համայնքը՝ նորաստեղծ և տաղանդավոր արտիստների միջև երկխոսություն սկսելու համար։
Կապ, որ կապենք միմյանց
Համայնքի հիմնադիր Կարեն Հովհաննիսյանի խոսքով՝ ստեղծման միտքը վաղուց իր գլխում է էղել։ Որպեսզի այս ամենը «չոր առևտուր» անվանումը չստանար, պետք էր այն համտեսել երաժշտությամբ, ցուցահանդեսով, ֆիլմերով ու մուլտֆիլմերով։ Համայնքի առաջին նախաձեռնությունը 2023թ-ի հուլիսին կազմակերպված երկօրյա «մարկետն» էր, որի ընթացքում ցուցադրվեցին մեկը մեկից տարբեր տասից ավելի ֆիլմեր, մեկը՝ Կաննից, մի քանիսն էլ ՝ Ոսկե ծիրանից։ Դրանց մեջ տեղ գտան նաև սկսնակ ռեժիսորների գործերը։
«Այս «մարկետի» շեշտը դրված չէր ցուցահանդես-վաճառքի վրա: Բայց, ի զարմանս ինձ, երիտասարդ նկարիչների՝ տարածքում ցուցադրված նկարների մեծ մասն իր նոր տիրոջը գտավ այդ ընթացքում»,- ասում է Կարեն Հովհաննիսյանը։
![](https://journalist.am/wp-content/uploads/2023/11/2-7-1024x1012.jpg)
Լուսանկարը՝ Կարեն Հովհաննիսյանի
Նկուղային հարկը ՝ հինգ արտիստի աչքերով
Մասնակցության առաջարկ ստանալուց հետո նկարչուհի Լառա Խաչատրյանը մի քիչ շփոթվել է, որովհետև դա իր առաջին ցուցահանդեսն էր: Կազմակերպիչներից ստացած օգնության միջոցով իր նկարները որակյալ թղթերի վրա է տպագրել, որպեսզի դրանք ավելի տեսանելի լինեն։
«Հաճելի է տեսնել, թե մարդիկ ինչպես են լուսանկարվում քո նկարների մոտ։ Ոչ բոլորն ինձ դեմքով գիտեին, բայց այդ օրվանից հետո բավականին շատ մարդիկ իմացան իմ մասին, ու միայն լավ արձագանքներ եմ լսել»,- պատմում է Լառա Խաչատրյանը։
Երանուհի Ներսիսյանը նույնպես մասնակցության առաջարկ է ստացել ու համաձայնվել մեծ սիրով։
«Ինձ համար շատ կարևոր է աշխատանքներս ցուցադրելու ցանկացած գաղափար։ «Կապը» ինձ տվեց կապ նոր մարդկանց հետ, միավորեց արվեստագետներին ու ստեղծեց ակտիվ ու հաճելի միջավայր»,- ասում է Երանուհի Ներսիսյանը։
Ցուցահանդեսին մասնակցել են նաև նկարիչներ Ինա Միքայելյանը, Բեռտա Փոլադյանը և լուսանկարիչ Լիլիթ Գալստյանը։
![](https://journalist.am/wp-content/uploads/2023/11/3-3-913x1024.jpg)
Լուսանկարը՝ Կարեն Հովհաննիսյանի
Ջազն անպակաս
«Մարկետի» օրերին 50-ականների ջազը հնչեցրել են Թոնին ու ընկերները։ Թոնին պատմեց, որ Երևան գալուց անմիջապես հետո իմացել է «Կապի» մասին ու մեծ սիրով համաձայնել է մասնակցել։ Որոշ մարդիկ էլ գալիս էին միայն չորս երիտասարդներից բաղկացած խմբին ունկնդրելու և լիցքավորված տուն գնալու համար։
![](https://journalist.am/wp-content/uploads/2023/11/4-3-683x1024.jpg)
Լուսանկարը՝ Կարեն Հովհաննիսյանի
Սահակյանցի մուլտֆիլմերն ու սկսնակների հաջողված ֆիլմերը
Դեռ մանկուց շատերիս հայտնի մուլտֆիլմերը նորից կենդանացել են էկրանին՝ երեք հարյուր հոգանոց դահլիճում։ «Ձախորդ Փանոսը», «Կիկոսի մահը», «Մկների ժողովը», «Բարեկենդանը» և էլի ու էլի մուլտֆիլմեր են ցուցադրվել: Հայ-ռուսական համալսարանի ուսանող Արթուր Նազարեթյանի նոր ֆիլմը՝ «Սանգրիան» նույնպես հանձնվել է կինոսերների դատին:
«Ձգտող ռեժիսորի համար դա շատ մեծ փորձ և հնարավորություն էր՝ աշխատանքը համալսարանի պատերից դուրս ցույց տալու համար, այն էլ նման մեծ դահլիճում»,- ասաց Արթուր Նազարեթյանը։
Վիկտորյա Մկրտչյան
3-րդ կուրս