Գյումրիում, Սեպտեմբերի 21-ին, ՀՀ Անկախության օրվա 28-րդ տարեդարձին նվիրված միջոցառումներին մասնակցում էին չարենցավանցիները: Տոնական այս օրն ավելի գեղեցկացրին Ռուսթավելի փողոցում անցկացվող «ՀՀ մարզային կոլորիտը» ցուցադրությանը մասնակցող ՀՀ այլ մարզերի քաղաքացիները։
Ցուցադրությանը մասնակցում էին Կոտայքի մարզի Չարենցավան համայնքի քաղաքացիները։ Կրթության, մշակույթի, սպորտի, երիտասարդության և սոցիալական աջակցության բաժնի պետ Արմինե Զաքարյանը մեզ հետ զրույցում նշեց. «Ամեն տարի այս տոնը նշվում է մեր քաղաքում՝ Չարենցավանում, սակայն այս տարի, քանի որ անկախության տոնի միջոցառումները կենտրոնացված են Գյումրիում, մենք նունպես որոշեցինք մասնակցել, ներկայացնել մեր քաղաքի շնորհալիների աշխատանքները, ծանոթանալ մյուս մարզերի մշակույթներին և տոն դարձնել յուրաքանչյուրի օրը»:
Նախկին արդյունաբերական քաղաքը ներկայացրեց իր տաղանդավոր երաժիշտներին, ինչպես նաև ձեռագործ տիկնիկներ, որոնք քանդակագործ Էդիկ Ծուղունյանի ձեռքի աշխատանքներն են։ Թե՛ երաժիշտները, թե՛ տիկնիկներն արժանացան տեղացիների և հյուրերի հավանությանը։
Օրվա վերջում չարենցավանցիները տուն վերադարձան բարձր տրամադրությամբ և տպավորված Գյումրիի գեղեցկությամբ։ Համայնքապետարանի խմբին միացած Մերի Մարտիրոսյանը մեզ հետ զրույցում կարծիք հայտնեց, որ գյումրեցիներն անչափ հյուրասեր և ջերմ են ու հավելեց. «Շատ տպավորված եմ, քանի որ առաջին անգամ եմ գտնվում հայրաքաղաք Գյումրիում ու շատ ափսոսում եմ, որ այս տարիքում եմ ծանոթանում Գյումրիի մշակույթին»:
Տաթևիկ Գաբրիելյան
2-րդ կուրս
