Մեր կյանքի տարբեր փուլերում մենք նոր ծանոթություններ ենք
հաստատում, և, իհարկե, բոլորիս համար էլ կարևոր է մարդկանց հարցում չսխալվելը։
Շատերը հիմք են ընդունում առաջին ստացած տպավորությունները, իսկ մյուսները փորձում
են պրպտել՝ գտնելու մարդու ներաշխարհ տանող բանալիները։ Հոգեբանները տարբեր
միջոցներ են առաջարկում, օրինակ՝ ժեստերի
և միմիկաների լեզվի սերտումը։ Բայց դրանք հաճախ խաբուսիկ կարող են լինել ։
Հոգեբան Հասմիկ Սիմոնյանն առաջարկում է մարդկանց բացահայտելու մի քանի տարբերակներ։
Առաջինը՝ մեր կոլեգայի, հարևանի կամ ընկերուհու քայլերին հետևելն է։ Պետք է ուշադիր լինել, թե տարբեր իրավիճակներում՝ լինի դա խանութում, թե գործնական հանդիպման ժամանակ, տվյալ մարդն ինչպես է իրեն դրսևորում։ Կամ, եթե մեկը խանութից մշտապես նույն խմորեղենն է գնում, ապա նա չի սիրում փոփոխություններ։
Մեր օրերում համացանցը մարդու ճանաչողության համար մեծ դերակատարում ունի։ Կարելի
է եզրակացնել, որ եթե մենք չունենք բավարար միջոցներ տվյալ մարդու հետ ժամանակ
անցկացնելու համար, ապա կարելի է հետևել նրա սոցիալական էջերին, որտեղ էլ կտեսնենք՝
նա ուր է գնում, ինչ մտքեր ունի, և
որոշակի պատկերացում կկազմենք տվյալ անհատի մասին։
Հաջորդ քայլը՝ պետք է հետևենք նրա տված նկարագիրներին։ Երբ անհատը սկսում է դրական հատկանիշներ վերագրել որևէ մեկին, մեծ է հավանականությունը, որ հենց ինքն իր մեջ կրում է այդ դրական գծերը։
Մարդը, ով մշտապես իր շուրջն է նայում փողոցն անցնելիս, կտրուկ որոշումները չի կայացնում, այլ երկար մտածում և վերլուծում է հնարավոր անախորժությունները։
Լիանա Հակոբյան
3-րդ կուրս
