«ՕՐԱԿԱՆ 2000 ԴՐԱՄ ՏԱԼԻՍ ԵՄ ՏԱՔՍԻԻՆ. ՏՆՕՐԻՆՈՒԹՅՈՒՆՆ ԷԼ ԱՍՈՒՄ Է՝ ՈՆՑ ՈՒԶՈՒՄ...

«ՕՐԱԿԱՆ 2000 ԴՐԱՄ ՏԱԼԻՍ ԵՄ ՏԱՔՍԻԻՆ. ՏՆՕՐԻՆՈՒԹՅՈՒՆՆ ԷԼ ԱՍՈՒՄ Է՝ ՈՆՑ ՈՒԶՈՒՄ ԵՔ, ԱՐԵՔ». ՏՆԻՑ ԴՈՒՐՍ ԱՇԽԱՏՈՂ ՔԱՂԱՔԱՑԻՆԵՐԻ ԽՆԴԻՐՆԵՐԸ

347

Կորոնավիրուսի կանխարգելման նպատակով ապրիլի 1-ից ՀՀ պարետ, ՀՀ փոխվարչապետ Տիգրան Ավինյանի որոշմամբ՝ https://www.gov.am/files/docs/3985.pdf?fbclid=IwAR36RaLXs-r5x3Zp7m0A7-APC9rW8Bq0a_TA-ghUytWcI6yNCJbXmNt_GGw  դադարեցվեց հանրային տրանսպորտի գործունեությունը՝ բացառությամբ երկաթուղային տրանսպորտի: Այս օրերին թույլատրելի է միայն երթուղային տաքսիների գործունեությունը: Սա է պատճառը, որ մեզ հետ զրույցում այս օրերին տնից դուրս աշխատող քաղաքացիները մտահոգություն հայտնեցին, որ իրենց աշխատավարձի գրեթե կեսը հատկացնում են ճանապարհածախսին կամ դիմում այլ անհարմար միջոցների՝ աշխատանքի հասնելու համար:

Աշխատանքը չվտանգելու համար որոշ քաղաքացիներ մեզ հետ համաձայնեցին խոսել միայն այն պայմանով, որ իրենց անունները չհրապարակենք: Ուստի նյութում ներկայացված անուն, ազգանունները փոփոխված են:

«ՊԱՐՄԱ» սուպերմարկետների ցանցի աշխատակցուհի Մարի Սմբատյանն ասաց, որ գործատուն է վճարում այս օրերի ճանապարհածախսը. «Մեզ համար տաքսիներ են տրամադրել իրենց հաշվին»:   

Նշենք, որ Երևանի քաղաքապետարանի հանձնարարությամբ՝ https://www.yerevan.am/am/news/40-ert-owghinerov-kirakanats-vi-erewanowm-gortsogh-30-bowzhhastatowt-yownneri-showrj-650-ashkhatakit/ և ՀՀ պարետի ցուցումի համաձայն` ապրիլի 3-ից Երևան համայնքի ավտոբուսներով պետք է կատարվեր շուրջ 650 բուժաշխատողների ամենօրյա, երկկողմանի տեղափոխում: Պարզելու՝ որքանո՞վ է այս հայտարարությունը համապատասխանում իրականությանը, խոսեցինք բուժաշխատողի հետ. «Ես աշխատում եմ պոլիկլինիկայում: Մեր բոլոր բուժաշխատողներից վերցրել են հասցեները, և ավտոբուսը գալիս է առավոտյան, տնից վերցնում, տանում աշխատատեղ, հետո՝ երեկոյան, բերում է տուն»:

«Բիլայն Արմենիա»-ի աշխատակից Ժաննան խոսեց իրենց կազմակերպության առաջարկած միջոցների մասին. «Այն աշխատակիցների համար, որոնք տնից չեն կարող աշխատել ու գնում են գրասենյակ, Բիլայնը հատկացրել է ծառայողական մեքենաներ, որոնք տանում-բերում են աշխատողներին»:

Սակայն սա միայն մեդալի մի կողմն է: Մեր փոքրիկ հարցախույզի ընթացքում պարզեցինք, որ այս ոլորտում խնդիրներն ավելի շատ են, քան դրական նախադեպերը:

Մեր մի զրուցակից պատմեց, որ իրենց ընտանիքի անդամների մեկն աշխատում է «Երևան Սիթի» սուպերմարկետների ցանցում: Մեր հարցին՝ գործատուն հոգո՞ւմ է ճանապարհածախսը, նա պատասխանեց. «Ոչ, չի հոգում: Ամեն օր նա 2000 դրամ վճարում է տաքսիին՝ աշխատանքի գնալ-գալու համար»:

Մեր մյուս զրուցակիցը «Կայզեր» սուպերմարկետների ցանցի աշխատակից է: Նա ամեն օր իր միջոցներով է հասնում աշխատանքի. «Օրական 2000 դրամ տալիս եմ տաքսիին: Տնօրինությունն էլ ասում է՝ ոնց ուզում եք, արեք»:  

Իհարկե, նշված սահմանափակումներն արվում են՝ քաղաքացիների անվտանգությունից ելնելով և հանրային առողջության ապահովման նպատակով, սակայն մյուս կողմից՝ կան մարդիկ, որոնց համար այս սահմանափակումները լրացուցիչ հոգսեր են ստեղծում: Հիշեցնենք, որ տրանսպորտային միջոցների վերաբերյալ սահմանափակումն ուժի մեջ է մինչև ապրիլի 12-ը ներառյալ:

Վարդուհի Հովհաննիսյան

2-րդ կուրս

Կիսվել