Ռուսաստանն արտադրել է Covid-19-ի դեմ պատվաստանյութի առաջին խմբաքանակը, հաղորդում է Interfax լրատվական գործակալությունը:
Պատվաստանյութի արտադրության մասին Ռուսաստանի Առողջապահության նախարարությունը հայտնել էր դեռ շաբաթ օրը: Պատվաստանյութը մշակող Գամալեայի անվան վարակաբանության և միկրոկենսաբանության հետազոտական կենտրոնի տնօրեն Ալեքսանդր Գինցբուրգը հայտնել էր, որ ծրագրվում է մինչև դեկտեմբեր-հունվար ամիսները հասնել ամսական 5 մլն դեղաչափի արտադրության, իսկ 1 տարվա ընթացքում Ռուսաստանը լիովին ապահովված կլինի պատվաստանյութով:
Լրատվամիջոցը նաև հաղորդում է, որ պատվաստանյութն արտադրվելու է Զելենոգրադի «Բիննոֆարմ» գործարանում, որը մտնում է «Սիստեմա» բաժնետիրական ֆինանսական ընկերության մեջ: «Սիստեման» հայտնել է, որ գործարանը կարող է արտադրել պատվաստանյութի տարեկան 1.5 մլն դեղաչափ:
Հիշեցնենք՝ կորոնավիրուսի դեմ աշխարհում առաջին պատվաստանյութի գրանցման մասին Ռուսաստանը հայտնել էր օգոստոսի 11-ին:
