Դեկտեմբերի 8-10-ը Մեդիա նախաձեռնությունների կենտրոնում տեղի ունեցավ մոբայլ լրագրության դասընթաց։ Դասընթացը վարում էր մուլտիմեդիա վիդեո պրոդյուսեր, խմբագիր, լրագրող Հարություն Մանսուրյանը։ Մասնակիցների շրջանակը լայն էր՝ պատմաբաններ, կենսաբաններ և ուղղակի լրագրությամբ հետաքրքրվողներ։ Առաջին օրվա ընթացքում մասնակիցները թեստի միջոցով սովորեցին, թե ինչ է մոբայլ լրագրությունը։ «Լրագրողական պատմություն․ սա է մոբայլ լրագրության առանցքը։ Կարևոր են նաև դինամիկ վիդեոն, մոնտաժի ձայնը։ Եթե ձայնը փչացնեք, դեռ ինչ-որ կերպ կկարողանանք փրկել վիդեոն, իսկ եթե կադրն եք փչացրել, հետդարձի ճանապարհ չկա»,- նշեց Հարություն Մանսուրյանը։ Հանձնարարվեց 30 վայրկյանանոց հոլովակներ պատրաստել դիմացի նստածի մասին։ Մասնակիցների մեծ մասը իրար չէր ճանաչում, և սա առիթ եղավ, որ ավելի մոտիկից շփվեն։
Սոնան և Անահիտը միասին պիտի աշխատեին։ «Սառույցը հեշտ կոտրվեց․ երկուսս էլ սիրում ենք լրագրությունը, չէինք կարող լեզու չգտնել,- պատմում է Անահիտը։ -Ինձ Սոնայի ազգանունը գրավեց․ ամեն օր չէ, որ Խլոպուզյան ազգանունով մարդ կհանդիպես»։ Սոնայի ազգանունը ինձ էլ հետաքրքրեց։ Որոշեցի պարզել, թե ինչ է նշանակում։ «Ձնծաղիկ է նշանակում»,- ժպիտով պատասխանեց Սոնան։
Օրվա վերջում մասնակիցները ստացան ևս մեկ հանձնարարություն՝ պատմել Երևանի տրանսպորտի որևէ խնդիր մասին կադրերի միջոցով։ Մասնակիցներին տրամադրվեցին միկրոֆոններ։ Մեկը որոշեց մետրոյի մասին գրել, մյուսը ՝ հաշվիչներով ավտոբուսների։ Այսպես ավարտվեց առաջին օրը։
![](https://journalist.am/wp-content/uploads/2021/12/1-20.jpg)
Երկրորդ օրը մասնակիցները կենտրոնում ընդամենը մի քանի ժամ անցկացրին․ դասընթացավարը շեշտը դրել էր գործնական աշխատանքների վրա։ «Երկրորդ օրը, առաջին օրվա հետ համամետած, ավելի թեթև էր․ բոլորով գնացինք նկարահանումների»,- նշեց կենսաբան Բելլան, որի նկարած 30 վայրկյանանոց հոլովակը բանախոսի ֆավորիտն էր։
![](https://journalist.am/wp-content/uploads/2021/12/2-16.jpg)
Երրորդ օրը մոնտաժին էր նվիրված․ մասնակիցները պետք է նախորդ օրվա նկարածը կտրեին և բերեին հետագա մոնտաժի, բայց օրն առանց խնդիրների չանցավ։ Սոնայի միկրոֆոնը թույլ էր, ձայնը լավ չէր ստացվել, և նա որոշեց նորից նկարել։ «Ինձ հետ մի քանի մասնակից ևս խնդիր ունեցան, նորից նկարեցին»,- պատմում է։
Ի վերջո հոլովակները պատրաստ էին։ Սոնան շատ էր անհանգստանում, բայց ամեն ինչ լավ անցավ․ «Ընդհանրապես փորձ չունեի, դասընթացի միջոցով կարողացա այնքան լավացնել կարողություններս, որ շատերը հավանեցին»։
Դասընթացն ավարտվեց դեկտեմբերի 10-ին։ Մասնակիցները խոստացան օգտագործել ստացված գիտելիքները իրենց արտադրած բովանդակության որակը բարելավելու համար։
Անի Հովհաննիսյան
2-րդ կուրս